चैत २५ गते अन्तर्राष्ट्रिय दातृ निकाय सम्मेलन गर्ने स्वास्थ्य मन्त्रालयको तयारी

हेल्थ टुडे,
काठमाडौं, ५ माघ : स्वास्थ्य तथा जनसंख्या मन्त्रालयले आउदो चैत २५ गते राजधानीमा अन्तर्राष्ट्रिय दातृ सम्मेलन गर्ने प्रस्ताव गरेको छ । विश्व स्वास्थ्य दिवसको अवसर पारेर स्वास्थ्य तथा जनसंख्या मन्त्रालयले राजधानीको दशरथ रंगशालामा अन्तर्राष्ट्रिय दातृ निकायको सम्मेलन आयोजना गर्ने योजना बनाएको हो । स्वास्थ्य तथा जनसंख्य मन्त्री मोहनबहादुर बस्नेतले नेपालको स्वास्थ्य क्षेत्र सुधारका लागि दातृ निकायको भूमिका अहं रहेकोले स्वास्थ्य क्षेत्रका लागि थप सहयोग जुटाउनका लागि अन्तर्राष्ट्रिय सम्मेलन गर्न लागिएको जानकारी दिए ।
सम्मेलनमा स्वास्थ्यका क्षेत्रमा सहयोग गरिरहेका तथा गर्न सक्ने दातृ निकायलाई आमन्त्रण गरिने र उनीहरुलाई स्वास्थ्य क्षेत्रमा सहयोग सहकार्यका लागि थप अनुरोध गर्ने तयारी मन्त्रालयले गरेको छ । स्वास्थ्य मन्त्री बस्नेतका अनुसार अन्तर्राष्ट्रिय दाता सम्मेलन आयोजना गर्न स्वास्थ्य मन्त्रालयले स्विकृति प्रदान गर्न मन्त्रीपरिषद्मा प्रस्ताव पेस गरेको छ । अर्थ मन्त्रालयले चालु आर्थिक वर्षको बजेटमा २० प्रतिसत भन्दा बढी बजेट कटौती गरेकाले स्वास्थ्य मन्त्रालयलाई आफ्ना कार्यक्रम सञ्चालन गर्न समेत धौ धौ परिरहेको मन्त्री बस्नेतले बताए । स्वास्थ्य क्षेत्रमा कटौती गरिएको बजेट परिपूर्ति गर्न यो सम्मेलनले राहात दिने स्वास्थ्य मन्त्रालयका अधिकारी बताउछन् । स्वास्थ्य क्षेत्रमा पछिल्ला वर्षहरुमा दातृ निकायहरुको सहयोग रासी समेत घट्दै गइरहेका बेला नेपाल सरकारले आवश्यकता र औचित्यका आधारमा स्वास्थ्य क्षेत्र सुदृढ हुने गरि सम्मेलन आयोजना गर्नलाई सकारात्मक पहल भएको विज्ञहरुले बताएका छन् ।