हेल्थ टुडे,
काठमाडौं, १८ फागुन : औषधि व्यवस्था विभागले एक महिनाको अन्तरालमा लोमस फर्मास्यूटिकल्सले उत्पादन गरेका ४ प्रकारका औषधि गुणस्तरहिन भन्दै बिक्री बितरणमा रोक लगाएको छ । विभागले माघ तेस्रो र चौथो सातामा लोमस फार्मास्युटिकल्स प्रालिले उत्पादन गरेको ओएनओ सिरप र पारासिटामोल न्यून गुणस्तरको पाइएको भन्दै बिक्रीमा रोक लगाएको थियो । अहिले फेरि लोमस फर्मास्यूटिकल्स प्रालिले उत्पादन गरेका दुई प्रकारको औषधि न्यून गुणस्तरको फेला परेको विभागले जनाएको छ । प्रयोगशाला परीक्षणका क्रममा लोमसबाट उत्पादित ‘मेट्रो सस्पेन्सन’ नामक मेट्रोनिडाजोल र ‘हेल्माप्रेन’ नामक अबलेन्डाजोल ४०० एमजी ट्याब्लेट न्यून गुणस्तरको भएको पुष्टि भएको छ । विभागले यी औषधि बिक्री वितरणमा रोक लगाएको हो । त्यसैगरि विभागले फर्माको इन्टस्ट्रिज् लिमिटेडद्वारा उत्पादित औषधि पनि न्यून गुणस्तरको फेला परेको जनाएको छ ।
यसैगरी, विभागले परीक्षणका क्रममा फर्माको इन्टस्ट्रिज् लिमिटेडद्वारा उत्पादित ‘मेट्रो पी’ नामक मेट्रोनिडाजोल औषधि पनि न्यून गुणस्तरकोे भएको पुष्टि गरेको छ । सो औषधिको ब्याच नम्बर २२÷०१ न्यून गुणस्तरीय पाइएपछि बिक्रीमा रोक लगाइएको विभागले जनाएको छ ।
विभागका अनुसार, बजार अनुगमनपछि शंका लागेर ती औषधिको नमूना परीक्षण गरिएको थियो । बजारमा पठाइएका औषधि गुणस्तरहीन रहेको पुष्टि भएसँगै विभागले तत्काल फिर्ता गर्न निर्देशन दिएको छ ।
औषधि ऐन २०३५ को दफा १४ बमोजिम विभागले बिक्री वितरण रोक्का गरी फिर्ता गर्न निर्देशन दिएको हो । खराबी देखिएका ब्याचका औषधिहरू बजारमा बिक्री वितरण, सिफारिस र प्रयोग समेत नगर्न सबैमा विभागले अनुरोध गरेको छ । उत्पादक कम्पनीलाई हाल बजारमा रहेको औषधि फिर्ता गरी सोको विवरण विभागमा बुझाउन निर्देशन समेत दिएको छ ।
Leave a Reply