विश्व मिर्गौला दिवसको अवसरमा चैत १ गते दशरथ रंगशालामा प्रत्यारोपण खेलकुद हुने

हेल्थ टुडे,
काठमाडौं, ३० फागुन : विश्व मिर्गौला दिवसको अवसरमा काठमाडौंको दशरथ रंगशालामा चैत १ गतेका दिन नेपाल प्रत्यारोपण खेलकुदको आयोजना गरिने भएको छ । अंग प्रत्यारोपण समाज नेपाल र नेपाल प्रत्यारोपण सोसाइटीको आयोजनामा अंग प्रत्यारोपित र कलाकार, पत्रकार, समाजसेवी, चिकित्सक, कर्मचारीहरु बीच मैत्रीपूर्ण फुटबल आयोजना हुने आयोजकले जनाएको छ । विगत १४ वर्षदेखि प्रत्यारोपण खेलकुद आयोजना हुदै आइरहेको छ । अंग प्रत्यारोपण गरेका व्यक्ति पनि अन्य समान्य व्यक्ति सरह जिवन यापन गर्न सक्षम छन् भन्ने भावनाको विकास गर्न उक्त खेलकुद आयोजना गर्ने गरिएको आयोजक समितिका संयोजक डा कल्पना श्रेष्ठले जनाकारी दिइन । विगत वर्षहरुमा मिर्गौला रोग उपचार र रोकथाममा काम गर्ने विभिन्न संस्थाहरुले छुट्टा छुट्टै मनाउने गरेकोमा यो वर्ष अंग प्रत्यारोपण समाज नेपाल र नेपाल प्रत्यारोपण सोसाइटी एउँटै भएपछि पहिलो पटक संयुक्त रुपमा कार्यक्रम आयोजना गर्न लागिएको हो । यस पटक शहीद धर्मभक्त राष्ट्रिय प्रत्यारोपण केन्द्र, त्रिभुवन विश्व विद्यालय शिक्षण अस्पताल , चिकित्सा विज्ञान राष्ट्रिय प्रतिष्ठान, नेपाल सोसाइटी अफ नेफ्रोलोजी, नेपाल एशोसियसन अफ युरोलोजिक सर्जन्स, अंग प्रत्यारोपण समाज नेपाल, नेपाल ट्रान्सप्लान्ट सोसाइटी, स्वास्थ्य अभियान नेपाल, नेशनल किड्नी सेन्टर र काठमाण्डौ उपत्यका भित्रका अंग प्रत्यारोपण गर्ने अस्पतालहरु तथा मस्तिष्क मृत्यु पश्चात अंग दान गराउने अस्पतालहरुको संयुक्त आयोजनामा कार्यक्रम हुन लागेको शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठले जानकारी दिए । नेपालमा प्रत्येक १० जनामध्ये १ जनालाई मिर्गौला रोग लाग्ने गरेको छ । प्रत्यक बर्ष अंग्रेजी क्यालेन्डर अनुसार मार्च महिनाको दोस्रो विहिवार विश्व मिर्गौला दिवस मनाउने गरिन्छ । यस बर्षको विश्व मिर्गौला दिवसको नारा “मृर्गौला उपचारमा सबैको समान पहुँच र सुरक्षित चिकित्सकीय अभ्यास” भन्ने रहेको छ ।