मेडिसिटी हस्पिटलमा १४ महिनामा जम्मा २३ जनाको मिर्गौला प्रत्यारोपण

हेल्थ टुडे,
काठमाडौं, २९ फागुन : आफुलाई उत्कृष्ठ अस्पताल दावी गर्ने ललितपुरको भैसेपाटीस्थित नेपाल मेडिसिटी हस्पिटलले विगत १४ महिनामा जम्मा २३ जनाको मिर्गौला प्रत्यारोपण गरेको छ । गैरआवासिय नेपाली (एनआरएन) को लगानीमा सञ्चालित यो देशकै सबैभन्दा महंगो अस्पताल हो । हस्पिटलले मंगलबार पत्रकार सम्मेलन गरेर विसं २०७९ को माघदेखि अहिलेसम्म १५० भन्दा बढी विरामी प्रत्यारोपणका लागि अस्पताल आएको भए पनि जम्मा २३ जनाको मिर्गौला प्रत्यारोपण गर्न सकेको जानकारी दिएको हो । नेपाल मडिसिटी अस्पतालमा प्रत्यारोपण देखि सम्पूर्ण उपचार खर्च १५ लाखसम्म लाग्ने मिर्गौला रोग विशेषज्ञ डा.ऋषि काफ्लेले बताए ।
“यहाँ ल्याप्रोस्कोपी विधिबाट उपचार गरिन्छ, जसका कारण मिर्गौला दाता तथा ग्रहणकर्तालाई दुखाई पनि कम हुन्छ भने बिरामी चाँडै निको भएर घर जान पाउँछन्,” डा. काफ्लेले भने । अस्पतालमा प्रत्यारोपण गर्न आएका अधिकाशं बिरामीहरुको मिर्गौला बिग्रनुको प्रमुख कारण उच्च रक्तचाप र मधुमेह रहेको नेफ्रोलोजी तथा मृगौला प्रत्यारोपण विभागका प्रमुख डा. प्रकाश पौडेलले बताए ।
“२३ जनामा अधिकाशं उच्च रक्तचाप र मधुमेहकै कारण मृगौला बिग्रेर उपचारका लागि आएका थिए । अर्को कारण भनेको ग्लोमेरुलो नेफ्राइटीस्, शरीरमा प्रोटिनको मात्रा बढि भएर लिकेज हुन थालेपछि मिर्गौला बिग्रेर जान्छ,” डा पौडेलले भने ।
नेपालमा कूल जनसंख्याको १० प्रतिशत अर्थात करीब ३० लाख मानिसमा कुनै न कुनै रुपमा मृगौलाको समस्या रहेको विभिन्न अध्ययन अनुसन्धानहरुले देखाएको छ । हरेक वर्ष नेपालमा मृगौलाका ३ हजार नयाँ बिरामीहरु डायलासिसका लागि थपिने गरेका छन् ।
दुबै मृगौला खराब भइसकेपछि गरिने डायलासिस पनि जिन्दगीभर गनुपर्ने हुन्छ र यसको उपयुक्त उपचार भनेकै मिर्गौला प्रत्यारोपण हो ।