शहीद धर्मभक्त प्रत्यारोपण केन्द्रमा यो वर्षमात्र १५ जनाको कलेजो प्रत्यारोपण

हेल्थ टुडे,
काठमाडौं, २४ जेठ : भक्तपुरका रहेको शहीद धर्मभक्त राष्ट्रिय प्रत्यारोपण केन्द्रले यो वर्ष मात्र १५ जनाको कलेजो प्रत्यारोपण सम्पन्न गरेको छ । संसारकै जटिल मानिने कलेजो प्रत्यारोपणमा केन्द्रले पछिल्ला दिनमा गति लिन थालेको हो । केन्द्रमा अहिलेसम्म २५ जनाको कलेजो प्रत्यारोपण सम्पन्न भएको छ । २५ औं कलेजो प्रत्यारोपी निजगढ, बाराका ५४ वर्षीय बद्रीप्रसाद चौलागाई प्रत्यारोपण भएको १० औं दिन सोमबार सकुशल डिस्चार्ज भएका छन् । उनलाई उनकी ५१ वर्षिय श्रीमती यानु कुमारी गौतमले कलेजो दान दिएकी थिइन । केन्द्रका कार्यकारी निर्देशक समेत रहेका बरिष्ठ कलेजो तथा मिर्गौला प्रत्यारोपण शल्य चिकित्सक डा.पुकारचन्द्र श्रेष्ठको नेतृत्वमा शहीद धर्मभक्त राष्ट्रिय प्रत्यारोपण केन्द्रमा यस वर्ष मात्रै १५ जनाको कलेजो प्रत्यारोपण भएको छ । केन्द्रमा संसारकै सबैभन्दा न्यूनतम शुल्कमा कलेजो प्रत्यारोपण हुने गरेको केन्द्रका कार्यकारी निर्देशक डा श्रेष्ठले जानकारी दिएका छन् ।
केन्द्र स्थापना भएको १२ वर्षमै देशको सबैभन्दा धेरै १२४८ जनाको मिर्गौला र २५ जनाको कलेजो प्रत्यारोपण सम्पन्न भएको छ । केन्द्रको उपयुक्त जमिन तथा आफ्नै भवनको अभाव भए पनि प्रत्यारोपण क्षेत्रमा विश्वस्तरीय सेवा उपलब्ध गराउँदै आएको छ । केन्द्रले अंग प्रत्यारोपणका क्षेत्रमा नयाँ आशा जगाएको छ ।