कर्णालीमा ब्लड बैंक स्थापना गर्न अमेरिका नेपाल मेडिकल फाउण्डेसनको सवा करोड सहयोग

हेल्थ टुडे,
काठमाडौं, २८ जेठ : कर्णाली स्वास्थ्य विज्ञान प्रतिष्ठान, जुम्लामा ब्लड बैंक स्थापना गर्न अमेरिका नेपाल मेडिकल फाउण्डेसनले रु. एक करोड २३ लाख सहयोग गरेको छ । फाउण्डेसनको २८ औं सभामा प्रमुख वक्ताको रुपमा आमान्त्रण गरिएका कर्णाली स्वास्थ्य विज्ञान प्रतिष्ठानका उपकुलपति डा. मंगल रावललाई उक्त सहयोग रकम प्रदान गरिएको हो । अमेरिकाको सिकागो सहरमा आयोजना गरिएको तिन दिवसिय सभामा डा.रावलले दुर्गमको स्वास्थ्य सेवाका चुनौति र संभावनाका विषयमा प्रस्तुतिकरण गरेका थिए ।
सो अवसरमा कर्णाली स्वास्थ्य विज्ञान प्रतिष्ठान र फाउण्डेसनबिच भविश्यमा हुन सक्ने सहकार्यका बिषयमा पनि छलफल भएको डा. रावलले जानकारी दिएका छन् । फाउण्डेसनको सभामा भाग लिन चिकित्सा विज्ञान राष्टिय प्रतिष्ठान वीर अस्पताल (न्याम्स) का उपकुलपति प्रा.डा भुपेन्द्र बस्नेत, नेपाल चिकित्सक संघका अध्यक्ष डा. अनिल कार्की र नेपाल स्वास्थ्य अनुसन्धान परिषद्का कार्यकारी सदस्य सचिव डा. प्रमोद जोशी लगायत नेपाली चिकित्सकहरु समेत सहभागी भएका छन् । फाउण्डेसनले नेपालको स्वास्थ्य क्षेत्र सुधारमा सहयोग र सहकार्य गर्दै आइरहेको छ ।