आईओएमको डीन नियुक्तीका लागि नाम सिफारिस गर्न समिति गठन

हेल्थ टुडे,
काठमाडौँ, १८ भदौ : त्रिभुवन विश्वविद्यालयले चिकित्साशास्त्र अध्ययन् संस्थान (आईओएम)को डीन नियुक्तीको लागि समिति गठन गरिएको छ । त्रिवि कार्यकारी परिषद्ले आईओएमको डीन नियुक्तिका लागि नाम सिफारिस गर्न ३२ साउनमा प्राडा कृष्णकुमार(केके) ओलीको संसोजकत्वमा तीन सदस्यीय छनौट समिति गठन गरेको थियो । उक्त समितिमा प्राडा सुवासप्रसाद आचार्य र प्राडा योगेन्द्रमान शाक्य सदस्य रहेका छन् । सिफारिस समितिले सूचना जारी गर्दै सो डीन पदका लागि इच्छुक तथा योग्य व्यक्तिले ७ दिन भित्र आशयपत्र इमेल गर्न आव्हान गरेको छ ।
त्रिवि आईओएममा डीन रहेकी प्राडा दिव्या सिंह शाहको चार वर्षे कार्यकाल गत ३ असारमा सकिएको थियो । तर नयाँ नियुक्ती हुन नसक्दा उनलाई नै अर्को व्यवस्था नहुँदासम्मका लागि भन्दै पुरानै जिम्मेवारीमा रही काम गर्न भनिएको छ । समितिले तोकिएको अवधी भित्र आएका आशयपत्रको अध्ययन गरी ५ जनालाई सर्टलिष्टमा राख्ने र तीमध्येबाट ३ जनाको नाम बर्णानुक्रम अनुसार त्रिवि कार्यकारी परिषदलाई सिफारिस गर्ने छ । परिषदले ती ३ जनामध्ये एक जनालाई डीन पदमा नियुक्ती दिने छ ।