मृत्युपश्चात् मानव अंग दान गर्ने परिवारलाई दुई लाख दिने स्वास्थ्य मन्त्रालयको निर्णय

हेल्थ टुडे,
काठमाडौं, ९ मंसिर : स्वास्थ्य तथा जनसंख्या मन्त्रालयले मृत्युपश्चात मानव अंग दान गर्ने दाताका परिवारलाई दुई लाख सहयोग गर्ने निर्णय गरेको छ । यसअघि परिवारलाई एक लाख दिने गरिएकोेमा बढाएर दुई लाख पुर्याउने निर्णय भएको हो ।
अंगदान गरेका व्यक्तिको परिवारलाई मानव अंग प्रत्यारोपण केन्द्रमार्फत एक लाख दिइँदै आइएको थियो । परिवारलाई दिइने पैसा थपका लागि अर्थ मन्त्रालयले आन्तरिक श्रोतबाट व्यवस्थापन गर्ने गरी सहमति दिएको जनाइएको छ । स्वास्थ्य मन्त्रालयको आन्तरिक श्रोतबाटै आवश्यक रकम व्यवस्थापन गर्ने गरी निर्णय गरिएको स्वास्थ्य मन्त्री प्रदीप पौडेलले बताएका छन् ।
यस्तै, अंग दानमा सघाउने अस्पताललाई यसअघि दिने गरिएको ५० हजारमामा मन्त्रालयले २५ हजार थप गरेर ७५ हजार पुर्याएको छ । मन्त्री पौडेलले पनि मृत्युपश्चत अंगदानको घोषणा गरिसकेका छन् । उनले भनेका छन्, ‘आफ्नो मृत्यपुपछि अरुको जीवन बचाउन चाहनेलाई प्रोत्साहन गर्न खोजेका हौ । एउटाको जीवनपछि अरुको जीवन बचाउने कार्यमा यस निर्णयले व्यापकता पाउने आशा गरेका छौं ।’
हाल प्रतिवर्ष मिर्गाैला प्रत्यारोपणका लागि एक हजार र कलेजो प्रत्यारोपणका लागि ५५ जनाले मानव अंग प्रत्यारोपण केन्द्रमा नाम टिपाउने गरेका छन् । तर, मस्तिष्क मृत्युपश्चात अंगदान गर्ने व्यक्ति निकै कम भएकाले हजारौं बिरामी अंगको प्रतिक्षामा छन् ।
विद्यमान कानूनी व्यवस्थाअनुसार जीवित रगतको नाता पर्ने बाहेकले अंगदान गर्न पाउँदैनन् । तर, मृत्युपश्चात दान दिने गरी अंगदान गर्न पाउने व्यवस्था छ ।
भक्तपुरको सहिद धर्मभक्त मानव अंग प्रत्यारोपण केन्द्रले देशमा वर्षेनी दुई सय मिर्गाैला तथा २० जनाको कलेजो प्रत्यारोपण गर्दै आएको छ । यो कुल अंग प्रत्यारोपणको झण्डै ७० प्रतिशत हो । मृत्युपश्चात् मानव अंग दान गर्ने परिवारलाई दिइदै आएको रकम बढाउनु पर्ने भन्दै भक्तपुरको सहिद धर्मभक्त मानव अंग प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठले बिगत लामो समयदेखि पैरवी गर्दै आइरहेका थिए । नेपालमा पहिलो पकट कलेजो प्रत्यारोपण गर्ने र सबैभन्दा बढी मिर्गौला प्रत्यारोपण गर्ने अंग प्रत्यारोपण सर्जन डा. श्रेष्ठले मृत्युपश्चात् मानव अंग दान गर्न देशका विभिन्न भागमा जनजागरण चलाउदै आएका छन् ।