नेपालमा पहिलो पटक हुदैछ स्वास्थ्य अनुसन्धान आचारसंहिता सम्वन्धि अन्तर्राष्ट्रिय सम्मेलन

हेल्थ टुडे,
काठमाडौँ, ७ मंसिर : ‘फोरम फर इथिकल रिभ्यु कमीटी इन द एशिया एण्ड वेस्टर्न प्यासिफिक रिजन (फरक्याप)’ २४ औँ शिखर सम्मेलन ९ देखि १२ मंसिरसम्म काठमाडौँमा हुने भएको छ ।
नेपाल स्वास्थ्य अनुसन्धान परिषद्को आयोजनामा यसपटक सम्मेलन काठमाडौँमा हुने भएको हो । परिषद फरक्यापको सदस्य समेत हो ।
उत्तरदायि अनुसन्धान अधिकतम लाभ ( म्याक्सिमाइजिङ बेनिफिट थ्रु रेस्पोन्सिवल कन्डक्ट अफ रिसर्च) मुल नारा तय गरिएको यो सम्मेलनमा स्वदेश तथा विदेशबाट अनुसन्धान आचार संहिता विषयसँग सम्बद्ध विभिन्न विधाका विज्ञहरु, अनुसन्धानकर्ताहरु, नीति निर्माताहरु, प्राज्ञिक सस्थाका प्रतिनिधिहरु तथा विद्यार्थीहरु गरी ६ सय बढीको उपस्थिति रहने बताइएको छ ।
सम्मेलनबारे जानकारी दिन परिषद्ले शुक्रबार आयोजना गरेको पत्रकार सम्मेलनमा परिषद्का कार्यकारी सदस्यसचिव डा प्रमोद जोशीले यस किसिमको सम्मेलन नेपालमै पहिलो पटक हुन लागेको बताए । उनले सम्मेलनमा विश्वका अमेरिका, जापान, बेलायत, फिलिपिन्स, पोल्याण्ड, मलेसिया, नर्वे, ग्रीस, केन्या, ब्राजिल, भारतलगायत २३ देशका सहभागीहरु प्रत्यक्ष तथा २०० भन्दा बढी सहभागीहरुले भर्चुअल सहभागिता जनाउने बताए ।
उनले कार्यक्रममा अनुसन्धान आचारसंहिताका विभिन्न पाटोहरुमा स्वदेशी तथा विदेशी अनुसन्धानकर्ताहरु बीच गहन छलफल, बहस तथा प्रस्तुतिकरण हुने जानकारी दिए ।
परिषद्का प्रमुख अनुसन्धान अधिकृत डा मेघनाथ धिमालले चार दिने सम्मेलनका लागि अनुसन्धान आचारसंहिताका विभिन्न विधामा प्राप्त भएका जम्मा ३०० वटा अब्स्ट्र्याक्ट मध्येबाट अन्तराष्ट्रिय अब्स्ट्र्याक्ट सेलेक्सन कमिटीबाट निर्धारित मापदण्ड अनुरुप रहेर ९० वटा मौखिक र १३ वटा पोस्टर प्रस्तुतिकरण छनोट गरिएको जानकारी दिए । सोमध्ये ६१ वटा प्रस्तुतिकरण अन्तर्राष्ट्रिय विज्ञहरुबाट हुने र २९ वटा प्रस्तुतिकरणहरु राष्ट्रिय विज्ञहरुद्धारा गरिने बताए ।
नयाँ बानेश्वरस्थित एभरेष्ट होटलमा हुने सम्मेलनको शुभारम्भ आइतबारबाटै भए पनि औपचिारक उद्घाटन भने सोमबार हुने छ ।