चिकित्सा शिक्षा आयोगले सरकारीमा पिजी सिट कम दिएको भन्दै चिकित्सक संघको विरोध

हेल्थ टुडे,
काठमाडौं, २४ माघ : चिकित्सा शिक्षा आयोगले सरकारी प्रतिष्ठानहरुमा स्नातकोत्तर तह (पिजी) अन्तर्गत एमडी÷एमएस÷एमडीएसको सिट संख्या कम तोकेको भन्दै नेपाल चिकित्सक संघले आपत्ति जनाएको छ। संघले बिहीबार विज्ञप्ति जारी गर्दै आयोगको निर्णल न्यायसंगत नभएको भन्दै उसले गरेको निर्णयको विरोध गरेको हो ।
चिकित्सा शिक्षा आयोगद्वारा आज मिति २०८१ माघ २४ गते प्रकाशित गरिएको एमडी÷एमएस÷एमडीएसको सिट संख्याप्रति नेपाल चिकित्सक संघको गम्भीर ध्यानाकर्षण भएको छ,’ विज्ञप्तिमा भनिएको छ, ’सरकारका प्रतिष्ठानहरुमा क्षमता भएको तथा विज्ञ टोलीद्वारा निर्धारण गरिए अनुसार सिट थप हुने अवस्था हुँदा हुँदै सिट संख्या बढेर नआउनु खेदजनक रहेको छ।’
संघले सरकारी प्रतिष्ठानमा सिट संख्या कम तोक्दा नेपाल भित्रका जेहेन्दार चिकित्सकहरु स्नातकोत्तर तालिमको अवसरबाट बञ्चित भइ विदेश जान बाध्य हुने ठहर गरेको छ।यसैगरी, संघले चिकित्सा शिक्षा ऐन तथा नियमावलीमा आवश्यक संशोधन गरी समस्याहरुको यथाशीघ्र दीर्घकालीन स्थायी समाधान गर्न पनि माग गरेको छ। यस किसिमका निर्णयका कारण नेपाली चिकित्सक विदेशिने क्रम बढेको भन्दै चिििकत्सकलाई आन्दोलित हुनु पर्ने अवस्था आउन नदिन आयोगले पुनर्विचार गर्नु पर्ने जनाएको छ ।