औषधीको मूल्य नीति सम्बन्धी प्रतिवेदन प्रति औषधि व्यवसायीको विरोध

हेल्थ टुडे,
काठमाडौँ, २८ जेठ : औषधीको मूल्य नीति सुझाव समितिले मंगलबार स्वास्थ्य तथा जनसंख्या मन्त्राी प्रदीप पौडेललाई बुझाएको प्रतिवेदन प्रति औषधि उत्पादक संघ सहित ९ वटा संस्थाले त्यसको विरोध गरेका छन । औषधि उत्पादक र व्यवसायीको हितमा प्रतिवेदन नभएकोले उनीहरुले मंगलबार साझ आकस्मिक पत्रकार सम्मेलन गरि विरोध गरेका छन । आफुहरुलाई उत्त, सुझाव समितिमा सहभागी नगराएको र सुझाव नमानेको भन्दै उक्त सुझाव प्रतिवेदन कार्यन्वयन नगर्न स्वास्थ्य मन्त्री पौडेललाई उनीहरुले आग्रह गरेका हुन । नेपाल औषधि उत्पादक संघका अध्यक्ष महेश प्रधानले प्रतिवेदन व्यवसायी मैत्री नभएकोले आफूहरुको असहमती रहेको बताए । उपेन्द्र यादव स्वास्थ्य मन्त्री भएका बेला औषधि परामर्श समितिको बैठकले गरेका निर्णय कार्यन्वयन गर्नु पर्ने आफुहरुको माग रहेको प्रधानको प्रधानले बताए ।
औषधि उत्पादक संघका उपाध्यक्ष सन्तोष बरालले ओषधिको मूल्य समायोजन गर्ने निर्णय गर्दा स्वास्थ्य मन्त्रालयले औषधि व्यवसायी सहित सरोकारवालासँग छलफल गर्नु पर्ने बताए । औषधि आयातकर्ता संघका महासचिव पवन आचार्यले स्वास्थ्य मन्त्री, मन्त्रालयका सचिव, स्वास्थ्य सेवा विभागका महानिर्देशक यी सबै केही समयका लागि मात्र कुर्शीमा पुगेका पटके भएको आक्षेप लगाउदै औषधि व्यवसायका आफुहरु स्थायी सरकार भएकोले आफूहरुको सहभागिता हुनु पर्ने बताए । नेपाल चिकित्सक संघका महासचिव डा. संजीव तिवारीले चिकित्सकले महंगो औषधि लेख्ने गरेकाले औषधिको मूल्य महंगो भएको कुरा सुझावमा समेटिएकोले चिकित्सक संघले त्यसको विरोध गरेको बताए । सरकारले औषधिको मूल्य घटाउने प्रयास गर्दा औषधि व्यवसायीले उपभोक्ताको हितलाई ख्यालै नगरि आफ्नो फाइदा मात्र हेरेर विरोध गर्नु आफैमा विरोधाभाष भएको उपभोक्ता अधिकारीकर्मी सरोज महर्जनले बताए ।