जलेर खरानी भएपछि ‘एनएचआरसी ’ मा शरणार्थी बन्यो स्वास्थ्य मन्त्रालय

हेल्थ टुडे,
काठमाडौं, २९ भदौ : रामशाह पथमा रहेको स्वास्थ्य तथा जनसंख्या मन्त्रालय जेन्जी प्रदर्शनकारीहरुले भदौ २४ गते जलाएपछि स्वास्थ्य मन्त्रालय अहिले शरणार्थी जस्तै भएको छ । कागजात, फर्निचर, कम्प्युटर, गाडी मोटर सबे जलेर खरानी भएपछि अस्थायी रुपमा नेपाल स्वास्थ्य अनुसन्धान परिषद् (एनएचआरसी) को भवनमा स्वास्थ्य मन्त्रालय शरणार्थी बनेको हो । सुन्यबाट सुरु गर्नु पर्ने अवस्था आएपछि स्वास्थ्य तथा जनसंख्या मन्त्रालयका सचिव डा विकाश देवकोटा सहित मन्त्रालयका उच्च अधिकारीले आईतबार बिहानै एनएचआरसीबाट कामकाज सुरु गर्ने गरि छलफल गरेका छन् । मन्त्रालयका सचिव डा। देवकोटाले् भने, ‘मन्त्रालयको खरानी बाहेक केही रहेन । अव अहिले अस्थायी रुपमा एनएचआरसीको नव निर्मित भवनबाट अस्थायी रुपमा सेवा सञ्चालन गर्ने तयारी गर्दैछौ । ’
देशमा राजनीतिक परिवर्तनपछि छिट्टै बिस्तार हुन लागेको मन्त्रीपरिषद्मा स्वास्थ्य मन्त्री को बन्ने थाहा नभएपनि जति बेला पनि नयाँ मन्त्री नियुक्त भएर आउन सक्ने भएकाले मन्त्रीका लागि पनि कार्यालय बनाउनु पर्ने दायित्व स्वास्थ्य सचिव देवकोटा सहितका स्वास्थ्य अधिकारीको छ । डा देवकोटाले भने, ‘अहिले अस्थायी रुपमा एनएचआरसीको बन्नै लागेको भवनको माथिल्लो तलामा स्वास्थ्य मन्त्रीज्युका लागि कार्यालय बनाउने काम सुरु गरिरहेका छौ । अस्थायी रुपमा आजै बनिसक्छ । ’ तर यो स्थायी समाधान भने होइन । केही समयपछि स्वास्थ्य तथा जनसंख्या मन्त्रालयलाई शिहदरबार भित्र प्रतिस्थापन गर्नु पर्ने आवश्यकता रहेको डा देवकोटाले बताए । त्यसका लागि नव नियुक्त प्रधानमन्त्री, मन्त्री सहित मुख्य सचिवलाई आग्रह गर्ने र सिहदरवार भित्र प्रतिनिधि सभासँगै बन्न लागेका केही भवनमध्ये एउँटा भवन स्वास्थ्यलाई उपलब्ध हुने विश्वास डा। देवकोटाको छ । ५० वर्ष पुरानो स्वास्थ्य तथा जनसंख्या मन्त्रालय मातहत देशभरि ३० हजार भन्दा कर्मचारी कार्यरत छन् ।