चिकित्सा शिक्षा आयोगको उपाध्यक्षमा प्राडा श्रीकृष्ण गिरी

हेल्थ टुडे,
काठमाडौ,२७ भदौः सरकारले चिकित्सा शिक्षा आयोगको उपाध्यक्षमा प्राडा श्रीकृष्ण गिरीलाई नियुक्त गरेको छ । मन्त्रिपरिषद् बैठकले प्राडा गिरीलाई नियुक्त गर्ने निर्णय गरेको हो । प्राडा गिरी हाल राष्ट्रिय ट्रमा सेन्टरमा कार्यरत छन्। उनी चिकित्सा विज्ञान राष्ट्रिय प्रतिष्ठानका पूर्व रेक्टर हुन् । चिकित्सा शिक्षा ऐन अनुसार शुल्क निर्धारण समितिको सदस्यका रुपमा समेत उनले काम गरेका छन्।

यसअघि २९ साउनमा बसेको सर्चकमिटिको बैठकले आयोगको उपाध्यक्षमा तीन जनाको नाम सिफारिस गर्ने निर्णय गरेको थियो । कमिटिले प्राडा गिरी सहित प्राडा सुरेन्द्र शेरचन, प्राडा शम्भुकुमारलाई सिफारिस गरेको थियो । शिक्षा मन्त्रालयले चिकित्सा शिक्षा आयोगको उपाध्यक्ष पदमा खुल्ला प्रतिस्पर्धाबाट छनौट गर्न दुई पटक विज्ञापन गरेको थियो । पछिल्लो पटक १ देखि १५ साउनको म्यादमा ११ जनाले दरखास्त हालेका थिए ।

दरखास्त हाल्नेहरुमा प्राडा श्रीकृष्ण गिरी, प्राडा पारशकुमार पोखरेल, प्राडा निलमणि उपाध्याय, प्राडा तरुण पौडेल, प्राडा यहुनचन्द्र सिवाकोटी र प्राडा रमेशप्रसाद सिंह रहेका छन् । त्यसैगरी प्राडा राजेन्द्रप्रसाद साह, प्राडा सुरेन्द्र शेरचन, प्राडा शम्भुकुमार पहारी, प्राडा प्रमोदकुमार सर्राफ र प्राडा जेएन पाण्डेय हिमालीको दरखास्त परेको थियो ।

ती मध्ये सर्राफ र हिमालीको दरखास्त रद्ध भएको थियो । समितिले २६ र २७ साउनमा दरखास्त हालेका ९ जनालाई प्रस्तुतिकरण सहित अन्तरवार्तामा सहभागि गराएको थियो । त्यसअघि आवेदन हालेका ६ जनाको आवेदन रद्ध गर्दै आयोगले दोस्रोपटक आवेदन मागेको थियो ।