हेल्थ टुडे,
काठमाडौ,१४ कात्तिकः काठमाडौ उपत्यकामा रगतको चरम अभाव भएको छ । रगत अभाव भएपछि बिरामी समस्यामा परेका छन् । रगत अभावको कारण मुख्यगरी दुर्घटना, रक्तश्राव, प्रसूति, मिर्गौला, थालसेमिया, हेमोफिलियाका बिरामीको उपचार समेत प्रभावित भएको छ ।
रेडक्रसको केन्द्रीय रक्तसञ्चार केन्द्रले पनि रगत अभाव भएको जनाएको छ । चाडबाड परेकोले रक्तदान कार्यक्रम हुन नसक्दा पर्याप्त रगत संकलन नभएपछि रगत अभाव भएको केन्द्रले जनाएको छ । काठमाडौं, भक्तपुर र ललितपुरमा रगत अभाव देखिएको छ । उपत्यकामा हाल दैनिक दुई सय ५० पिन्ट रगत माग छ।
दसैं, तिहार, छठलगायतका चाडपर्वका कारण रक्तदान नहुँदा मौज्दातमा राखिएको रगत सकिन लागेको रेडक्रस रक्तसञ्चार केन्द्रले जनाएको छ । दसैअघि डेंगुको प्रकोप भएका बेला रगत उपयोग बढी भएकाले पनि अहिले अभाव देखिन थालेको केन्द्रको भनाई छ ।
आपत्कालीन अवस्थामा बाहेक अन्य बिरामीलाई रगत दिन नसकिने अवस्था रहेको रक्तसञ्चार केन्द्रले जनाएको छ । रगत अभाव भएपछि रेडक्रसले विभिन्न संघसंस्था र रक्तदाता समूहलाई दान गर्न आह्वान गरेको छ ।
Leave a Reply