प्रधानमन्त्री ओलीको दोस्रोपटक डायलासिस गर्ने तयारी

हेल्थ टुडे,

काठमाडौं,  कार्तिक १४ :  ग्रान्डी हस्पिटलमा बुधबार भर्ना भएका  प्रधानमन्त्री केपी ओलीको दोश्रो पटक डायलासिस गर्ने तयारी भइरहेको छ । प्रम ओलीको १२ वर्ष पहिले भारतको नयाँ दिल्लीस्थित एपोलो हस्पिटलमा मिर्गौला प्रत्यारोपण गराएको थियो ।  प्रधानमन्त्री ओलीको उपचारमा संलग्न चिकित्सकीय टोलीले दोस्रो पटक ग्रान्डीमा डायलाइसिस गर्ने तयारी सुरु गरेका छन । बुधबार गरेको डायलासिसले सोचे अनुसार काम नगरेपछि चिकित्सकहरुले दोश्रो पटक डायलासिस गर्ने तयारी गरेका हुन । उनलाई डायलासिस गरिएको र गर्न लागिएको कुरा गोप्य राख्ने प्रयास प्रमको सचिवालयले गरेको छ ।

प्रधानमन्त्रीको स्वास्थ्य अवस्थाका बिषयमा सबैतिरबाट चर्चा र चासो व्यक्ति हुन थालेपछि बुधबार साझ प्रधानमन्त्रीकी निजी चिकित्सक डा. दीव्यासिंह र ग्राण्डी हस्पिटलका मेडिकल डाइरेक्टर डा. चक्रराज पाण्डेले संयुक्त विज्ञप्ति जारी गर्दै ओलीको स्वास्थ्य अवस्था समान्य रहेको र बुधबार नभए बिहीबार अस्पतालबाट डिस्चार्ज गर्ने जनाएका थिए । उपचारमा संलग्न एक चिकित्सकका अनुसार प्रम ओलीको  रगतमा क्रियाटिनिनको स्तर निकै माथि रहेकाले एक पटक गरेको डाइलासिसले राम्ररी काम गर्न सकेको छैन । दुई पटक डाइलासिस गरेपछि डिस्चार्ज गर्ने वा केही दिन असपतालमै राखेर उपचार गर्ने बिषयमा निर्णय गरिने उपचारमा संलग्न चिकित्सकले बताएका छन ।

ती चिकित्सकले भने, एक हप्तामा दुई देखि तिन पटकसम्म पनि डाइलासिस गर्न सक्ने अवस्था आउन सक्छ । त्यो कुरा अहिले नै भन्न सकिन्न । प्रमको स्वास्थ्य उपचारका बिषयमा के गर्ने ? के नगर्ने ? सबै अधिकार डा. दीव्यालाई दिइएको छ । प्रम ओलीको रगतको कल्चरका लागि पठाइएको र त्यसको रिपोर्ट शनिबारसम्म मात्र आउने हस्पिटल स्रोतले जनाएको छ । गलत सूचना प्रवाह गरेको र स्वास्थ्य अवस्थाका बिषयमा सूचना लुकाइएको भन्दै डा. दीव्या र डा. पाण्डेको सर्वसाधारणले आलोचना गरेका छन ।