डाक्टरहरु चुनावी दौडमा , पेशागत समावेशी चिकित्सक समूहको ८ बुदे प्रतिबद्घता

हेल्थ टुडे,
काठमाडौं, ६ पुष : नेपाल चिकित्सक संघको आउदो माघमा हुन गइरहेको निर्वाचनलाई ध्यानमा अहिले चिकित्सकहरु चुनावी दौडमा छन् । संघको नयाँ नेतृत्वका लागि अहिले मुख्य गरि नेपाली कांग्रेस निकट चिकित्सकहरु लोकतान्त्रिक समूह र नेकपा निकट चिकित्सकहरु पेशागत समावेशी समूह बनाएर प्रतिस्पर्धामा छन् । लोकतान्त्रिक समूहले आफ्नो ५ बुदे प्रतिबद्घता सार्वजनिक गरेको तीन दिनपछि आईतबार पेशागत समावेशी समूहले राजधानीमा पत्रकार सम्मेलनको आयोजना गरि ८ बुदे प्रतिबद्घता घोषणा गरेको छ ।
प्रतिबद्घतापत्रमा पेशागत समावेशी समूहले सक्रिय नेतृत्व, चिकित्सक संघको सदस्यता वृद्धि, चिकित्सकको पेसागत सुरक्षा,विशेषज्ञ चिकित्सक उत्पादनमा जोड, पेशागत क्षमता अभिवृद्धि,गुणस्तरीय स्वास्थ्य, सरकारी स्वास्थ्य सेवामा सुधार र अनलाइन प्रणालीको विकास गरि ८ बुदालाई प्रमुखताका साथ अगाडि सारेका छ । पत्रकार सम्मेलनमा पेशागत समावेशी समूहबाट अध्यक्षका उम्मेदवार डा. पुष्पमणि खरालले नेपाल चिकित्सक संघको बिगतको नेतृत्वले चिकित्सकको हितका लागि आन्दोलन गर्ने गरेको भएपनि त्यसलाई टुंगोमा नपुर्याएर बिचमै तुहाउने काम गरेकोले आफ्नो नेतृत्वको समूहले जित हासिल गरे हरेक किसिमका आन्दोलनलाई टुंगोमा पुर्याउन् दाबी गरे । एकै किसिमको नेतृत्व लामो समयसम्म संघमा हावी भएकाले सदस्यता बढ्न नसकेको, स्वच्छाचारी प्रवृति बढेको, अनियमितता भएको डा. खरालले आरोप लगाए ।
डा. खरालले लगाएको आरोपको उनकै समूहबाट बरिष्ठ उपाध्यक्षकी उम्मेदवार डा. रक्षा श्रेष्ठले प्रतिवाद गरिन । नेपाल चिकित्सक संघको कोषाध्यक्ष रहेकी डा. रक्षाले संघमा कुनै अनियमितता नभएको दावी गरिन । उनले भनिन, ‘ संघमा मैले कुनै अनियमितता हुन दिएन । ’ डा. खरालले आफ्नो समूहमा बामपन्थी बिचारधाराका चिकित्सक मात्र नभएर मधेश, पहाड, हिमाल सबै क्षेत्र र वर्गको प्रतिनिधित्व भएकाले आफूहरुको समूह पेशागत भएको बताए । नेपालका चिकित्सकहरुको सेवा सुविधा र तलव सार्कका राष्ट्रहरुमध्ये सबैभन्दा कम भएकाले आफ्नो चुनावी एजेण्डा चिकित्सकको तलव वृद्धि रहेको जानकारी दिए । कार्यक्रममा उपाध्यक्षका उम्मेदवार डा. रन्जित कुमार झा, सदस्यका उम्मेदवार डा. राकेशकुमार साह लगायतले आआफ्नो भनाई राखेका थिए । पेशागत समावेशी समूहले डा. खरालको नेतृत्वमा वरिष्ठ उपाध्यक्षमा डा. रक्षा श्रेष्ठ, उपाध्यक्षमा डा. रन्जित कुमार झा, महासचिवमा डा. मधुर बस्नेत, कोषाध्यक्षमा डा. सञ्जितकुमार शाहलाई उम्मेदवार बनाएको छ ।
३ वर्ष कार्यकालका लागि अगामी माघ ४ र ५ गते उपत्यका बाहिर निर्वाचन हुने छ भने उपत्यकामा माघ १७ देखि २१ ग्तेसम्म निर्वाचन हुने छ । नेपाल चिकित्सक संघमा करिव १० हजार चिकित्सक सदस्य छन् । संघको इतिहासमा अहिलेसम्म नेपाली कांग्रेस निकट चिकित्सकहरुको समूह लोकतान्त्रिक समूह विजय हुदै आइरहेको छ ।