कैलालीको गौरीगंगाका २८३ को आरडिटी गर्दा कोरोना नेगेटिभ

सुरत रावत,
कैलाली, ११ बैसाख : कैलालीको गौरीगंगा नगरपालिकाका बिभिन्न वडाहरु र क्वारेन्टाइनमा रहेका गरि २८३ जनाको र्यापिड डाइग्नोस्टिक टेष्ट (आरडिटी) विधिबाट कोरोना भाइरसको नमुना परिक्षण गर्दा सबैको नेगेटिभ आएको छ । कसैमा पनि कोरोना भाइरस पोजेटिभ नपाइएपछि यहाँका स्थानिय खुसी भएका छन् । रोजगारीका लागि भारत गएका नगरपालिकाका सयौं बासिन्दा यो बिचमा घर फर्किएकाले स्थानिय वासिन्दा कोरोना संक्रमणको त्रासमा थिए ।
गौरीगंगा नगरपालिकामा चैत २८ गतेदेखि सुरु गरिएको आरडिटी चेकजाँच वडा नम्बर दुई, पाँच, छ, सात, नौ तथा ११ नम्बर वडामा बसोबास गरिरहेका र चौमालाको मालिका माविको क्वारेन्टाइनमा रहेका २३ जना गरि २८३ को आरडिटी चेकजाँच गरिएकोमा कसैमा पनि कोरोना पोजेटिभ नदेखिएको प्राथमिक स्वास्थ्य केन्द्र चौमालाका डा. फुलराम चौधरीले जानकारी दिए । बिहीबार मात्र गौरीगंगा नगरपालिकाको वडा नम्बर ६ मा ५८ जना र चौमालाको मालिका माविमा रहेका २३ गरि ८१ जनाको आरडिटी चेकजाँच गरिएको छ । भारत लगायत अन्य देशबाट नगरपालिका फर्किएका सबैको आरडिटी चेकजाँच गरिने डा. चौधरीले बताए ।
भारत लगायत अन्य देशबाट आएकाहरु ५८ जना चेकजाँच गराईएकोमा उनीहरु सबैको रिपोर्ट नेगेटिभ देखिएको थोरै भएपनि मानसिक त्रास कम भएको गौरीगंगा नगरपालिका वडा नम्बर ६ का वडा अध्यक्ष कमला शर्माले बताइन । सुदूरपश्चिम प्रदेशमा विगत एक महिना यता एक लाख भन्दा बढी नेपाली स्वदेश फर्किएकाले यो प्रदेशलाई कोरोनाको जोखिमपूर्ण प्रदेशका रुपमा लिइएको छ । यो प्रदेशमा ५ जना कोरोना संक्रमित फेला परेकोमा तिन जना निको भएर घर फर्किसकेका छन भने दुई जनाको सेती प्रादेशिक अस्पताल धनगढीमा उपचार भइरहेको छ । सुदूरपश्चिम प्रदेशमा आठ हजार भन्दा बढीको आरडिटी विधिबाट कोरोनाको नमुना परिक्षण भइसकेको छ ।