क्वारेन्टाइनमै जन्मिए जम्ल्याहा

हेल्थ टुडे,

दाङ, २७ बैसाख : कोरोना संक्रमणबाट बच्न तुलसीपुरको क्वारेन्टाइनमा रहेकी एक महिलाले जम्ल्याहा बच्चा जन्माएकी छिन् । तुलसीपुर उपमहानगरपालिका–१३ स्थित फूलबारीकी अनिता यादवले शुक्रबार राति जम्ल्याहा जन्माएकी हुन । उनले राप्ती प्रादेशिक अस्पताल तुलसीपुरमा जम्ल्याहा छोरी जन्माएकी हुन ।
अनिता बिहीबारदेखि क्वारेन्टाइनमा बसेकी थिइन । उनी गर्भवती थिइन । चार महिनादेखि भारतको रुपैडिहा बिलौनीस्थित माइती घरमा रहेकी उनी पैदलबाटै दुई दिनमा घर आइपुगेकी थिइन । भारतबाट आएको थाहा पाएपछि स्थानिय प्रशासनले उनलाई तुलसीपुर उपमहानगरपालिकाले रक्षाचौरस्थित क्वारेन्टाइनमा राखेको थियो । तुलसीपुरका जनस्वास्थ्य शाखा प्रमुख ओमप्रकाश न्यौपानेले उनको र्यापिड टेस्ट गर्दा रिपोर्ट नेगेटिभ आएको बताए । यादवलाई शुक्रबार दिउँसो १२ बजेतिर सुत्केरी व्यथा लागेपछि प्रादेशिक अस्पताल लगिएको थियो । अस्पतालकी मेडिकल अधिकृत डा. लिजा पुरीका अनुसार एउटा बच्चा १ किलो ८ सय ग्राम र अर्को बच्चा १ किलो ५ सय ग्राम तौल रहेको छ । दुबै बच्चाको अवस्था समान्य रहेको डा. पुरीले जानकारी दिइन । अस्पतालमा उनका आफन्त कोही नभएपछि अनिताको स्वास्थ्य उपचार र स्यहारको जिम्मा तुलसीपुर उपमहानगरपालिकाले लिने नगरप्रमुख घनश्याम पाण्डेले बताए ।