पदमराज जोशी,
काठमाडौं, ५ असार : काठमाडौंको अत्तरखेलमा रहेको नेपाल मेडिकल कलेजको ४९ प्रतिसत सेयर वीरगन्जको नेशनल मेडिकल कलेजले किनेको छ । नेपाल मेडिकल कलेजका अध्यक्ष डा. भोला रिजाल र नेशनल मेडिकल कलेज वीरगन्जका अध्यक्ष डा.जैनुद्दिन अन्सारीबिच शुक्रबार ४९ प्रतिसत सेयर लेनदेनको सम्झौतापत्रमा हस्ताक्षर भएको छ ।
यही असारभित्र ४९ प्रतिसत सेयर वाफतको रकम नेपाल मेडिकल कलेजका सञ्चालकहरुलाई तिर्ने सहमतीपत्रमा हस्ताक्षर सम्पन्न भएको नेशनल मेडिकल कजेज वीरगन्जका अध्यक्ष डा.जैनुद्दिन अन्सारीले बताए । नेपाल मेडिकल कलेजले प्रति सेयर ७०१ रुपैया (कर कट्टा गरि) का दरले १ अर्ब ७२ करोड, ५६ लाख रुपैयामा ४९ प्रतिसत सेयर नेशनल मेडिकल कलेजलाई बिक्री गरेको डा.अन्सारीले जानकारी दिए । नेपाल मेडिकल कलेजका सेयर होल्डर्सका नाममा ५० लाख २४ हजार कित्ता सेयर रहेको उनले बताए । नेशनल मेडिकल कलेजले नयाँ मेडिकल कलेज खोल्ने भन्दै काठमाडौंको घट्टेकुलोमा भवन समेत किनेको छ । डा. गोबिन्द केसीको अनसनका कारण काठमाडौं नेशनल मेडिकल कलेजले सम्बन्धन पाउने अवस्था नभएपछि वीरगन्जको नेशनल मेडिकल कलेजले नेपाल मेडिकल कलेजको झण्डै आधा हिस्सा सेयर किनेको हो ।
अहिले ४९ प्रतिसत सेयर किनेको भए पनि निकट भविश्यमै बहुसंख्यक सेयर किनेर नयाँ किसिमले नेपाल मेडिकल कलेज चलाउने योजनाका साथै आफूहरु अगाडि बढेको डा. अन्सारीले बताए । उनले भने, ‘नेपाल मेडिकल कलेजका सञ्चालकहरुको पनि मनसाय पनि मेडिकल कलेजलाई नयाँ किसिमले चलाउन सक्ने टीम होस् भन्ने थियो । हामीमा त्यो क्षमता र अनुभव देखेपछि सम्झौता भयो ।
अब नयाँ व्यवस्थापन र नयाँ योजनाका साथ मेकिडल कलेज अगाडि बढ्ने छ । ’ नेशनल मेडिकल कलेजले वीरगन्जमा ७५२ बेडको मेडिकल कलेज सञ्चालन गरिरहेको छ । गत बर्ष सिनांमगलमा रहेको काठमाडौं मेडिकल कलेजको बहुसंख्यक सेयर विराटनगरको नोवल मेडिकल कलेजका सञ्चालक सुनिल शर्माले किनेका थिए ।
Leave a Reply