उपचार नपाई शिशु जन्माइसकेपछि सुत्केरीको मृत्यु

हेल्थ टुडे,

ओखलढुंगा, ३ साउन : सरकारले सुत्केरी व्यथा लागेकालाई उपचार गर्न निःशुल्क उद्धारको व्यवस्था मिलाएको छ । तर अझै पनि गाउँघरमा यसबारे धेरै जानकार छैनन् । शुक्रबारमात्रै जिल्लाको मोलुङ गाउँपालिका–७ पात्ले बाख्रे गाउँकी एक सुत्केरीले समयमा उपचार नपाउँदा ज्यान गुमाईन् । ३२ वर्षीया सुनिता लामिछानेको शिशु जन्माइसकेपछि उच्च रक्तस्रावका कारण निधन भएको हो ।

 सुनिताको घरदेखि आधा घण्टाको दूरीमा स्वास्थ्यचौकी भए पनि स्वास्थ्यकर्मीलाई जानकारीसम्म नदिएको वडाध्यक्ष हेमकुमार सुनुवारले बताए । सुनिताले शुक्रबार बिहान ८ बजे छोरा जन्माइन् । त्यसपछि रक्तस्राव रोकिएन । गाउँले र आफन्ते बोकेर स्वास्थ्यचौकीतिर लगे ।

वर्षायामका कारण गाडी चल्न नसक्ने भएकाले उनलाई बोकेरै करिब डेढ घण्टामा प्राप्चा पु¥याए । प्राप्चा स्वास्थ्यचौकीका स्वास्थ्यकर्मीले समेत मिसन अस्पताल ओखलढुंगा लैजान रेफर गरे । उनलाई गाडी खोजेर मिसन अस्पताल लाने क्रममा बाटोमै मृत्यु भयो ।

 जिल्ला स्वास्थ्य कार्यालय प्रमुख सुमन तिवारीले चेतना अभावकै कारण यस्तो दुःखद घटना भएको बताए । अगाडि जानकारी भएको भए जसरी पनि सुत्केरीको ज्यान बचाउन सकिने उनले बताए । ‘हेलिकप्टरबाट हामीले सुत्केरीको निःशुल्क उद्धार गरिरहेका छौं । तर यो घटनामा चेतनाकै अभाव देखियो,’ तिवारीले भने, ‘अब फेरि पनि हामी गाउँपालिकामा चेतनामूलक कार्यक्रमलाई थप प्रभावकारी बनाउने तयारीमा छौं ।’ तिवारीका अनुसार गएको दुई वर्षमा चार जना सुत्केरीको हेलिकप्टरमार्फत उद्धार भइसकेको छ । तीन वर्षअघि मात्रै साविकको पात्ले गाविस र हाल खिजीदेम्बा गाउँपालिका–९ की एक सुत्केरीको उच्च रक्तस्रावकै कारण ज्यान गएको थियो ।