सहिद धर्मभक्त राष्ट्रिय प्रत्यारोपण केन्द्रमा एकै दिन ४ जनाको मिर्गौला प्रत्यारोपण

हेल्थ टुडे,

काठमाडौं, ३० असार : भक्तपुरस्थित सहिद धर्मभक्त राष्ट्रिय प्रत्यारोपण केन्द्रमा बिहीबार एकै दिन चार जना जीवित दाताबाट प्राप्त मिर्गौला चार जना बिरामीमा प्रत्यारोपण गरिएको छ । लाइभ डोनरबाट एकै दिन ४ जनाको मिर्गौला प्रत्यारोपण गरिएको यो पहिलो घटना नेपालमा पहिलो भएको केन्द्रको दावी छ । अर्घाखाँचीकी २६ वर्षीया छोरीले ४८ वर्षीया आमाबाट, दोलखाका २७ सौतेनी छोराले ३८ वर्षीया आमाबाट, तनहुँका ३६ वर्षीया श्रीमान्ले ३५ वर्षीया श्रीमतीबाट र काभ्रेका ३५ वर्षीय छोराले ५२ वर्षीय बुबाबाट मिर्गौला प्राप्त गरेका हुन् ।
केन्द्रले यस वर्ष ९ सय जनाको निःशुल्क मिर्गौला प्रत्यारोपण गरेको जनाएको छ । प्रत्यारोपित व्यक्ति तथा अंगदाता सबैको स्वास्थ्य अवस्था सामान्य रहेको जनाउँदै केन्द्रले मुलुकमा लाइभ डोनरबाट एकै दिन ४ जनाको मिर्गौला प्रत्यारोपण गरिएको यो पहिलो घटना रहेको समेत दाबी गरेको छ । करिब ३ वर्षअघि एकै दिन केन्द्रमा २ जना जीवित दाता र २ जना ब्रेन डेथ भएका दाताबाट प्राप्त मिर्गाैला ४ जना विरामीमा प्रत्यारोपण गरिएको थियो । केन्द्रका निर्देशक एवं वरिष्ठ मिर्गाैला प्रत्यारोपण शल्यचिकित्सक डा.पुकारचन्द्र श्रेष्ठले मिर्गौला प्रत्यारोपण सेवा विस्तार गरिएको खण्डमा बिरामीले प्रत्यारोपणका लागि पालो कुर्नुपर्ने अवस्थाको अन्त्य हुने बताए ।

हाल मुलुकमा करिब ६ सय जना मिर्गौला प्रत्यारोपणको प्रतीक्षामा छन् । सातामा ६ देखि ८ जनाका हिसाबले वार्षिक करिब २ सयभन्दा बढीमा मिर्गौला प्रत्यारोपण भइरहेको केन्द्रले जनाएको छ । केन्द्रले मात्र माग धान्न नसक्ने हुँदा सातै प्रदेशमा प्रत्यारोपण विस्तारको योजनाअनुसार असार ९ देखि पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालमा सेवा सुरु भइसकेको केन्द्रको भनाइ छ ।