हेल्थ टुडे,
काडमाडौं, ३१ भदौ : यौनिक तथा अल्पसंख्यकहरुका लागि नेपाल परिवार नियोजन संघ (एफपान) ले हर्मोनल तथा लेजर थेरापी क्लिनिक सञ्चालनमा ल्याएको छ । नेपालमा यस किसिमको सेवा पहिलो पटक सुरु गरेको संघको दावी छ । नेपाल परिवार नियोजन संघको ६४ औं दिवसका अवसरमा शुक्रबार एक कार्यक्रमबिच संघको केन्द्रिय कार्यालय पुल्चोकमा सञ्चालन हुने उक्त हर्मोनल तथा लेजर थेरापी क्लिनिकको उद्घाटन गरिएको छ ।
समाज कल्याण परिषद्का सदस्य सचिव मजोज भट्ट, परिवार कल्याण महासाखाका निर्देशक डा. विवेक लाल, स्वास्थ्य तालिम केन्द्रका निर्देशक डा. यदु घिमिरे, परिवार नियोजन संघका अध्यक्ष हिमालय कसजू र संघका महानिर्देशक डा. नरेशप्रताप केसीले संयुक्त रुपमा क्लिनिकको रिबन काटेर उद्घाटन गरेका हुन । शुक्रबारदेखि सञ्चालनमा आएको क्लिनिकमा यौनिक तथा अल्पसंख्यकहरुले हर्मोन तथा लेजर थेरापी सेवा, हर्मोन सम्बन्धी परामर्श सेवा, छाला रोग सम्बन्धी सेवा र यौन संक्रमण परिक्षण तथा उपचार सेवा प्राप्त गर्न सक्नेछन ।
उक्त सेवा प्रदान गर्नका लागि संघले इन्डोक्राइनोलोजिस्ट डा. सुनिल पोखरेल र चर्मरोग विज्ञ डा. सिरप्पा बज्राचार्यलाई नियुक्त गरेको छ । ब्यु डायमण्ड सोसाइटीकी कार्यकारी निर्देशक मनिषा ढकालले यौनिक तथा अल्पसंख्यकहरुका लागि नेपालमा पहिलो पटक हर्मोनल तथा लेजर थेरापी क्लिनिक स्थापना हुनु खुशीको कुरा भएको बताउदै यसबाट सयौं सेवाग्राही लाभान्वित हुने आशा व्यक्त गरिन ।
आफूले अनुहारको कपाल हटाउन हजारौ रुपैया तिरेर बैंकक गएको स्मरण गर्दै ढकालले अब यो सेवा स्वदेशमै भए पछि आर्थिक अवस्था कमजोर भएकालाई सहज हुने बताइन । परिवार कल्याण महासाखाका निर्देशक डा. विवेक लालले क्लिनिक संचालन हुनु सकारात्मक भएको बताए । एफपानका अध्यक्ष कुुसजूले यौन तथा प्रजनन सेवा सबैको अधिकारको विषय भएकाले संघले यसका सक्दो काम गरिरहेको बताए । एफपानकी कार्यक्रम निर्देशक डा. विना श्रेष्ठले देश भरिमा २० प्रतिसत यौन तथा प्रजनन् सेवा संघले उपलब्ध गराइरहेको बताइन ।
Leave a Reply