एक जना क्यान्सर विरामीको उपचारमा सरदर खर्च ९ लाख ८१ हजार रुपैया

हेल्थ टुडे,
काठमाडौं, ७ चैत : नेपालमा एक जना क्यान्सरका विरामीले उपचारमा ९ लाख ८१ हजार खर्च लाग्ने गरेको अध्ययनले देखाएको छ । सुर्तिजन्य पदार्थ सेवन बिरुद्ध कार्यरत गैरसरकारी संस्था एक्सन नेपालले सुर्तिजन्य पदार्थको सेवनबाट हुने क्यान्सरको उपचारमा औषत प्रति विरामी ९ लाख ८१ हजार रुपैया खर्च हुने गरेको तथ्यांक सार्वजनिक गरेको हो ।
एक्सन नेपालले मंगलबार राजधानीमा आयोजना गरेको पत्रकार सम्मेलनमा एक्सन नेपालका कार्यकारी निर्देशक एवं अनुसन्धानकर्ता आनन्दबहादुर चन्दले सन् २०१९ मा नेपालका प्रमुख तिनवटा क्यान्सर अस्पतालहरु क्रमश विपी कोइराला भरतपुर क्यान्सर अस्पताल, नेपाल क्यान्सर अस्पताल र भक्तपुर क्यान्सर अस्पतालमा उपचार गराइरहेका १०३ क्यान्सरका विरामीका अध्ययन गरिएको जानकारी दिए ।
सुर्तिजन्य पदार्थको सेवनबाट हुने क्यान्सरका १८ वर्षदेखि ६५ उमेर समूहका तेश्रो र चौथो स्टेजका विरामीहरुको आर्थिक पाटोको मात्र आफुहरुले अध्ययन गरेको चन्दले बताए । अध्ययनमा उपचार पछि डिस्चार्ज भएका विरामी समावेश गरिएको र सुर्तिजन्य पदार्थ कहिल्यै सेवन नगरेका क्यान्सरका विरामी भने समावेश नगरिएको कार्यकारी निर्देशक चन्दले जानकारी दिए ।
चन्दका अनुसार सुर्तिजन्य पदार्थको सेवनले गर्दा हुने क्यान्सर विरामीको औषत उमेर साडे ५३ वर्ष रहेको पाइएको छ भने क्यान्सरका विरामी मध्ये ४६ प्रतिसत निरक्षर रहेको पाइएको छ ।
अध्ययनले १६ प्रतिसत क्यान्सरका विरामीले घरजग्गा बेचेर उपचार गराएकोृ पाइएको छ । २७ प्रतिसतले घरायसी बचतबाट उपचारको खर्च ब्यहोर्ने गरेका छन भने ६० प्रतिसत विरामीले आफन्तबाट ऋण लिएर उपचार खर्च ब्यहोर्ने गरेको अध्ययनले देखाएको छ ।
सरकारले क्यान्सरका विरामीलाई उपचारमा अनुदान वाफत प्रति विरामी एक लाख रुपैया दिने गरेको भए पनि त्यो एकदमै न्युन भएकाले सरकारले क्यान्सरका विरामीलाई उपचारमा दिने अनुदान रकम बढाउनु पर्ने र सुर्तिजन्य पदार्थमा कर बढाउनु पर्ने आवश्यक देखिएको अध्ययनले देखाएको चन्दले बताए ।