आईपीपीएफका महानिर्देशक डा. बर्मेजो बैसाख १८ मा नेपाल आउने

हेल्थ टुडे,
काठमाडौं, १४ बैसाख : ईन्टरनेशनल प्लाण्ड पेरेन्टहुड फेडरेसन (आईपीपीएफ) का महानिर्देशक डा.अल्भारो बर्मेजो यही बैसाख १८ गते नेपाल आउने भएका छन् । आईपीपीएफ नेपालमा यौन तथा प्रजनन् स्वास्थ्यका क्षेत्रमा सहयोग गर्दै आइरहेको अन्तराष्ट्रिय गैरसरकारी संस्था हो ।
चार दिने भ्रमणका क्रममा आईपीपीएफ महानिर्देशक डा. बर्मेजोले प्रधानमन्त्री पुष्पकमल दाहालसँग भेटवार्ता गर्ने छन् । डा.बर्मेजोले यौन तथा प्रजनन् स्वास्थ्य अवस्था र नीतिका विषयमा प्रधानमन्त्री दाहालका साथै नेपाल सरकारका उच्च अधिकारीसँग छलफल गर्ने आईपीपीएफको सदस्य संस्था नेपाल परिवार निजोजन संघले जनाएको छ । भ्रमणका क्रममा डा. बर्मेजोले गुणस्तरीय प्रजनन् स्वास्थ्य र सुरक्षित मातृत्व सेवाका साथै प्रजनन् अधिकारको सुनिश्चितताका लागि सरोकारवालासँग छलफल समेत गर्नु हुने छ ।
यौन अल्पसंख्यक समुदायका अगुवा, अपांगता भएका व्यक्ति र एचआईभी संक्रमितका प्रतिनिधिहरुसँग समेत डा. बर्मेजोले अन्तरक्रिया गर्ने कार्यक्रम रहेको संघले जनाएको छ । आईपीपीएफले नेपालमा यौन तथा प्रजनन् स्वास्थ्य सेवा र अधिकारका लागि नेपाल परिवार नियोजन सँघ मार्फत आर्थिक र प्राविधिक सहयोग उपलब्ध गराउदै आइरहेको छ ।