स्वास्थ्यको बजेट बढाउने नव नियुक्त स्वास्थ्य मन्त्री बस्नेतको दावी

हेल्थ टुडे,
काठमाडौं, २१ बैसाख : नव नियुक्त स्वास्थ्य तथा जनसंख्या मन्त्री मोहनबहादुर बस्नेतले स्वास्थ्यको बजेट घटाएर गुणस्तरीय सेवा प्राप्त गर्न कठिन हुने बताएका छन । मन्त्री बस्नेतले स्वास्थ्य तथा जनसंख्या मन्त्रालयमा पद बहाली गरेपछि मन्त्रालयका उच्च अधिकारी र सञ्चारकर्मीलाई सम्बोधन गर्दै राष्ट्रिय योजना आयोगले आउँदो आर्थिक वर्षका लागि स्वास्थ्य तथा जनसंख्या मन्त्रालयलाई चालु आर्थिक वर्षको भन्दा झण्डै ४० प्रतिसत बजेट कटौती गरेर ४१ अर्वको मात्र बजेट सिलिङ पठाएकोमा असन्तुष्टि व्यक्त गरेका हुन । चालु आर्थिक वर्षमा ६९ अर्व बजेट पाएको स्वास्थ्यले आउदो आर्थिक वर्षका लागि ४१ अर्बको सिलिङ पठाएको छ । मन्त्री बस्नेतले भने, अर्थतन्त्रमा केही संकुचल आएको छ । तर स्वास्थ्यमै त्यति ठूलो बजेट काटेपछि जनतालाई गुणस्तरीय सेवा कसरी दिन सकिन्छ ?
विकास भन्दा हरेक व्यक्तिको लागि ज्यान ठूलो भएको भन्दै मन्त्री बस्नेतले स्वास्थ्यको बजेट बढाउन आफु लागी पर्ने बताए । मन्त्री बस्नेतले विभिन्न अस्पतालहरुले किनेर प्रयोगमा नआएका महंगा उपकरणको खोजविन गरि त्यसको बिबरण एक हप्ताभित्र पेस गर्न मन्त्रालयका अधिकारीलाई निर्देशन दिए । स्वास्थ्य मन्त्रालय मातहतका चिकित्सक र कर्मचारी सबैले मिलेर काम गरेको खण्डमा राम्रो उपलब्धी हासिल गर्न सकिने भन्दै आफुले गफ गर्नेलाई भन्दा काम गर्नेलाई अवसर दिने बताए । मन्त्रालयका सचिव डा.रोसन पोखरेलले मन्त्री बस्नेतलाई स्वागत गर्दै मन्त्रालयका गतिविधिका विषयमा जानकारी गराएका थिए ।