डा.ओम मूर्तिको ‘जीवन्त सम्बन्ध’ लाई कोर्षमा राख्नु पर्ने हरिवंशको सुझाव

हेल्थ टुडे,
काठमाडौं, ५ असोज : वरिष्ठ मुटुरोग विज्ञ डा.ओम मूर्ति अनिलले लेख्नु भएको पुस्तक ‘जीवन्त सम्बन्ध’ लाई सरकारले विद्यार्थीहरुको कोर्ष बुकका रुपमा समावेश गर्नु पर्ने वरिष्ठ हास्य कलाकार हरिवंश आचार्यले सुझाव दिएका छन् । राजधानीको बसुन्धरास्थित यति इभेन्टमा शुक्रबार आयोजित डा.अनिलको नयाँ पुस्तक ‘जीवन्त सम्बन्ध’ को लोकार्पण समारोहमा वरिष्ठ हास्य कलाकार आचार्यले पुस्तक नयाँ पुस्ताका लागि पनि उत्तिकै लाभदायक र जिवनोपयोगी भएकाले यसलाई कोर्षमै अनिवार्य पाठ्यपुस्तकका रुपमा अध्ययन अध्यापन गराइनु पर्ने बताएका हुन । आचार्यले भने, ‘ यो पुस्तक कोर्षमा राख्नु पर्छ । त्यसपछि विद्यार्थी र शिक्षकले पनि पढ्छन । नपढे फेल भइन्छ भनेर पनि पढ्ने छन् । ’ यो पुस्तकले जिवन र जगतको गहिरो ज्ञान दिने आचार्यको दावी थियो ।
डा.अनिलको बहूप्रतिक्षित पुस्तक ‘जीवन्त सम्बन्ध’ को एक भव्य समारोहबिच उनकी माता राजकुमारी देवी सिंहले लोकार्पण गरेकी हुन । समारोहको प्रमुख अतिथि रहेका वरिष्ठ हास्य कलाकारद्वय मदनकृष्ण श्रेष्ठ र हरिवंश आचार्यले डा. अनिलको चिकित्सकिय सिपसँगै लेखन कला पनि अब्बल भएको भन्दै प्रशंसा गरे । मदनकृष्ण श्रेष्ठले त डा. अनिलको परिचय समेत अब बदलिएर लेखक समेत थपिएको बताए । श्रेष्ठले भने, ‘ डा. अनिलको परिचय अव लेखकको रुपमा समेत दर्ज भएको छ । ’
डा. रविन्द्र समिरले पुस्तकको समिक्षा गर्दै पुस्तकले चिकित्सकिय पाटोभन्दा भावनात्मक र नैतिकताको पाटोलाई समावेश गरेर डा. अनिलले समाजलाई अर्को गुण लगाएको बताए । उनले डा. अनिलको लेखन कलाको प्रशंसा गर्दै यो पुस्तक सबै उमेर समूहका व्यक्तिका लागि उत्तिकै उपयोगी भएको दावी गरे । चिकित्सा शास्त्र अध्ययन संस्थानका पूर्व डीन प्रा. डा. जगदीश अग्रवालले आफूले पढाउने बेलादेखि नै डा.अनिलमा अपार संभावना देखेको स्मरण गर्दै उनको चिकित्सकिय कलाका साथै लेखन कलाबाट आफू प्रभावित भएको बताए । पुस्तकको बिषयमा छोटो मन्तव्य राख्दै डा. अनिलले आफूले अनुभव गरेको र देखेका कुरालाई समेत समावेश गर्दै पुस्तक लेखेको बताउदै पुस्तकको विक्रीबाट प्राप्त हुने रोयल्टी समाजिक कार्यमा खर्च गरिने जानकारी दिए ।