नेपालमा पहिलो पटक भेटियो ओमिक्रोनको नयाँ सब भेरियन्ट ‘जेएन–वान’

हेल्थ टुडे,

काठमाडौं, २३ पुस : नेपालमा पहिलो पटक कोभिड–१९ संक्रमण ओमिक्रोनको नयाँ सब भेरियन्ट ‘जेएन–वान’ पुष्टि भएको छ । स्वास्थ्य तथा जनसंख्या मन्त्रालयले सोमबार विज्ञप्ति प्रकाशित गरि पहिलो पटक ‘जेएन – वान’ फेला परेको जनाएको हो । राष्टिय जनस्वास्थ्य प्रयोगशालाले देशका विभिन्न भागबाट संकलित गरेका १६ वटा नुमना परिक्षण गर्दा ७ वटामा ओमिक्रोनको नयाँ सब भेरियन्ट ‘जेएन – वान’ पुष्टि भएको हो । अहिले संसारका विभिन्न देशहरुका ओमिक्रोनको सव भेरियन्ट ‘जेएन – वान’ को संक्रमण बढ्दो क्रममा छ । कोरोनाको नयाँ भेरियन्ट ‘जेएन – वान’ को संक्रमण फैलिन नदिन स्वास्थ्य तथा जनसंख्या मन्त्रालयले प्रवेश बिन्दुका सबै हेल्थ डेस्कहरु, आवश्यक स्क्रिनिङ, निरन्तर निगरानी र स्वास्थ्य सेवा प्रदान गर्न मातहतका निकायलाई निर्देशन दिएको छ । यसका साथै मन्त्रालयले संभावित संक्रमणको जोखिमलाई मध्यनजर गरेर तयारी अवस्थामा रहन समेत मातहतका स्वास्थ्य संस्थाहरुलाई निर्देशन दिएको छ । यसका साथै मन्त्रालयले कोरोना संक्रमण र संक्रमणको फैलावट रोकथाम गर्नका लागि भीडभाडमा नजान, भौतिक दुरी कायम गर्न, मास्कको प्रयोग गर्न र साबुन पानीले हात धुन पनि अपिल गरेको छ । अमेरिका, भारत लगायतका देशमा ओमिक्रोनको नयाँ सब भेरियन्ट ‘जेएन –वान’ देखिएको छ ।