वीरमा आयो स्तन क्यान्सर परिक्षण गर्ने मेमोग्राफी, स्वास्थ्य मन्त्रीले गरे उदघाटन

हेल्थ टुडे,
काठमाडौं, २७ पुष : स्वास्थ्य तथा जनसंख्या मन्त्री मोहनबहादुर बस्नेतले वीर अस्पतालको नयाँ भवनको क्यान्सर विभागमा जडान गरिएको ममोग्राफी सेवाको शुक्रबार उद्घाटन गरेका छन् । मेमोग्राफी स्तन क्यान्सरको परिक्षणका लागि प्रयोग गरिने अत्याधुनिक मेसिन हो । थ्रि डी टेक्नोलोजी भएको उक्त मेमोग्राफी ३ करोड ८३ लाख रुपैयाको लागतमा वीर अस्पतालले किनेको हो । मेमोग्राफी सेवा उदघाटन गर्दै स्वास्थ्य मन्त्री बस्नेतले उपचारका लागि दूरदराजबाट वीर अस्पताल आउने गरेका विरामीलाई उपचार नपाएर फर्केर अन्त जाने अवस्था आउन नदिन विभिन्न सेवासँगै उपकरण पनि थप गर्दै लगिने बताए ।
वीर अस्पताल देशका सरकारी अस्पतालको नेतृत्वकर्ता अस्पताल भएकाले यसले दिने उपचार सेवा सहज र सुलभ हुनु पर्नेमा मन्त्री बस्नेतले जोड दिए । चिकित्सा विज्ञान राष्टिय प्रतिष्ठान ( वीर अस्पताल ) न्याम्सका उपकुलपति प्रा. डा. भुपेन्द्रकुमार बस्नेतले मेमोग्राफी सेवा सुरु भएपछि वीर अस्पतालले क्यान्सर उपचारको क्षेत्रमा नयाँ फड्को मार्ने बताए । प्रा. डा.बस्नेतले वीरको सेवा सुधार हुदै गएपछि पछिल्ला दिनमा वीरमा विरामीको संख्या बढेर दैनिक २ हजार पुगेको बताए ।