शहीद धर्मभक्त प्रत्यारोपण केन्द्रलाई प्रतिष्ठान बनाउनु पर्ने सांसदहरुको माग

हेल्थ टुडे,
भक्तपुर, ११ बैसाख : भक्तपुरका सांसदद्वय प्रेम सुवाल र दुर्लभ थापाले शहीद धर्मभक्त राष्ट्रिय प्रत्यारोपण केन्द्रलाई स्वास्थ्य विज्ञान प्रतिष्ठानको रुपमा विकास गर्नु पर्ने माग गरेका छन् । केन्द्रले आफ्नो १२ औं बार्षिकोत्सवको अवसरमा मंगलबार आयोजना गरेको कार्यक्रममा भक्तपुर क्षेत्र नम्बर १ बाट निर्वाचित नेपाल मजदुर किसान पार्टीका सांसद सुवाल र भक्तपुर २ बाट निर्वाचित नेपाली कांग्रेसका सांसद थापाले भक्तपुर क्यान्सर अस्पताल, भक्तपुर अस्पताल र शहीद धर्मभक्त राष्ट्रिय प्रत्यारोपण केन्द्रलाई मिलाएर स्वास्थ्य विज्ञान प्रतिष्ठान बनाउन सरकारसँग माग गरेका हुन । सांसद सुवालले प्रतिष्ठान बनाउने तयारीका साथ विधेयकको मस्यौदा समेत बनिसकेको जानकारी गराउदै सरकारले छिट्टै उक्त मस्यौदालाई परिमार्जन सहित संसदमा प्रस्तुत गर्नु पर्ने आवश्यकता रहेको बताए । मिर्गौला प्रत्यारोपण, कलेजो प्रत्यारोपण सहित मुटु रोगको सेवामा केन्द्रले गरिरहेको काम सन्तोषजनक रहेको बताउदै सांसद सुवालले केन्द्रको भौतिक संरचना बढाउन पनि सरकारले तत्काल पहल गर्नु पर्नेमा जोड दिए । उनले भने, ‘ भौतिक संरचना अभावमा जुन प्रकारको सेवा बिस्तार हुनु पर्ने हो त्यो हुन सकिरहेको छैन । तत्काल भौतिक संरचना बिस्तार गर्नु पर्छ । ’
अर्का सांसद थापाले भक्तपुरमा रहेका तिनवटै सरकारी अस्पताललाई एकिकृत गरेर स्वास्थ्य विज्ञान प्रतिष्ठान बनाउनु पर्ने माग गर्दै सरकारले यसका बिषयमा सोच्नु पर्ने बताए । मिर्गौलाका सबै विरामीले सहज रुपमा डायलासिस सेवा र प्रत्यारोपण सेवा पाउनका लागि केन्द्रलाई प्रतिष्ठानको रुपमा विकास गरेर सेवा बिस्तार गर्नु आवश्यक छ । थापाले भने, ‘ कसैको पहूचका आधारमा वा चिनेजानेको आधारमा भन्दा पनि सबै विरामीले उपचार सेवा प्राप्त गर्ने वातावरण बनाउनका लागि केन्द्रको भौतिक संरचना विस्तार गर्नै पर्छ । अव यो सागुरो भवनले धान्दैन । ’ उनले केन्द्रका लागि जग्गा उपलब्ध गराउने काम अन्तिम अवस्थामा पुगेको जानकारी दिए ।
स्वास्थ्य तथा जनसंख्या मन्त्रालयका अतिरिक्त सचिव डा.दीपेन्द्ररमण सिंहले १२ वर्षको छोटो अवधिमा लोभलाग्दो प्रगति गर्ने नेपालका अस्पतालहरुमा शहीद धर्मभक्त राष्ट्रिय प्रत्यारोपण केन्द्र एक भएको दावी गर्दै केन्द्रलाई प्रतिष्ठानका रुपमा विकास गर्न मन्त्रालय सकारात्मक रहेको बताए । शहीद धर्मभक्त राष्टिय प्रत्यारोपण केन्द्रका कार्यकारी निर्देशक समेत रहेका अंग प्रत्यारोपण सर्जन डा.पुकारचन्द्र श्रेष्ठले १२ वर्षको अवधिमा केन्द्रले १२ सय ३९ जनाको सफल मिर्गौला प्रत्यारोपण र २३ जनाको कलेजो प्रत्यारोपण सम्पन्न गरेको जानकारी गराउदै भौतिक संरचनाको अभावमा सेवा विस्तार गर्न समस्या परेको बताए । केन्द्रलाई स्वास्थ्य प्रतिष्ठानका रुपमा विकास गर्नु पर्ने आवश्यकता रहेको डा. श्रेष्ठले जोड दिए । कार्यक्रममा शहीद धर्मभक्त राष्ट्रिय प्रत्यारोपण केन्द्रमा बिगत एक दशकदेखि कार्यरत मिर्गौला रोग विज्ञ डा. दीपेश श्रेष्ठलाई उत्कृष्ठ कर्मचारीको रुपमा पुरस्कृत गरिएको थियो । कार्यक्रममा मिर्गौला प्रत्यारोपी प्रभावितहरुका तर्फबाट झंक श्रेष्ठले डा. पुकारचन्द्र श्रेष्ठलाई सम्मान गरेका थिए । विसं २०६९ बैसाख ११ गते तत्कालिन स्वास्थ्य सचिव स्वर्गिय डा. प्रविण मिश्र र डा. पुकारचन्द्र श्रेष्ठ सहितको अथक प्रयासमा यो केन्द्र स्थापना गरिएको थियो ।