स्वास्थ्य सेवा विभागको महानिर्देशकमा डा. देवकोटा, अरुको पनि जिम्मेवारी हेरफेर

हेल्थ टुडे,

काठमाडौं, ६ असोज : स्वास्थ्य सेवा विभागको महानिर्देशकको जिम्मेवारी डा. विकाश देवकोटाले पाएका छन् । स्वास्थ्य तथा जनसंख्या मन्त्री प्रदीप पौडेलले स्वास्थ्य सेवा विभागको महानिर्देशकमा स्वास्थ्य मन्त्रालयका अतिरिक्त सचिव डा. देवकोटालाई नियुक्त गरेका हुन । विभागकी महानिर्देशक डा. संगीता मिश्रलाई मन्त्रालय तानिएको छ । त्यसैगरि मन्त्री पौडेलले स्वास्थ्यका अन्य उच्च अधिकारीहरुको पनि जिम्मेवारी हेरफेर गरेका छन् ।
मन्त्रालयको गुणस्तर मापन तथा नियमन महाशाखा निर्देशकको जिम्मेवारी डा सरोज शर्मालाई दिइएको छ । महासाखाका निर्देशक डा मदन उपाध्यायलाई वीर अस्पताल पठाइएको छ ।
त्यसैगरि स्वास्थ्य समन्वय महाशाखा निर्देशकको जिम्मेवारी डा भीमप्रसाद सापकोटालाई दिइएको छ । महाशाखा निर्देशक डा चुमनलाल दासलाई नारायणी अस्पतालको प्रमुख मेडिकल सुपरिटेन्डेन्टको जिम्मेवारी दिइएको छ । स्वास्थ्य सेवा विभाग व्यवस्थापन महाशाखा प्रमुखमा डा पवनजंग रायमाझी आएका छन् । महाशाखामा रहेका डा श्रवण थापालाई ट्रमा सेन्टरमा सरुवा गरिएको छ।
टेकुस्थित स्वास्थ्य तालिम केन्द्रको निर्देशकको जिम्मेवारी यशोदा अर्यालले पाएकी छिन् । केन्द्रका निर्देशक डा अनुज भट्टचनको सार्क टिबी सेन्टरमा निर्देशकको रुपमा सरुवा भएको छ। सार्क टिबी सेन्टरमा रहेकी डा मनिषा रावललाई केन्द्रिय कारागार अस्पतालको निर्देशकको जिम्मेवारी दिइएको छ। कारागार अस्पतालमा निर्देशक रहेका डा प्रकाश बुढाथोकीलाई मन्त्रालयमा ल्याइएको छ । उनी मन्त्रालयका प्रवक्ता हुन ।
यसैगरी, कोशी अस्पतालको प्रमुख मेसुमा डा रूणा झा र गजेन्द्र नारायण सिंह अस्पतालको प्रमुख मेसुमा डा श्रीराम तिवारीले जिम्मेवारी पाएका छन्।
उपचारात्मक महाशाखामा डा सुधा देवकोटाले जिम्मेवारी पाएकी छिन् भने महाशाखाका डा अनुप बास्तोलालाई शुक्रराज ट्रपिकल तथा सरूवा रोग अस्पतालमा सरूवा गरिएको छ । मन्त्री नियुक्त भएको दुई महिनापछि पौडेलले मातहतका उच्च अधिकारीको सरुवा गरेका हुन ।