स्वास्थ्यमा जिम्मेवारी हेरफेर : सुचना केन्द्रका डा. केसी मन्त्रालय सरुवा

हेल्थ टुडे,
काठमाडौं, २५ कात्तिक : स्वास्थ्य तथा जनसंख्या मन्त्रालय मातहतका १० औं तहका केही चिकित्सक र कर्मचारीको जिम्मेवारी हेरफेर भएको छ । स्वास्थ्य तथा जनसंख्या मन्त्री प्रदीप पौडेलले मन्त्रीस्तरीय निर्णयबाट उनीहरुको जिम्मेवारी हेरफेर गरेका हुन ।
मन्त्री पौडेलको सचिवालय श्रोतका अनुसार कैलालीको गेटा अस्पतालको नेतृत्वको जिम्मेवारी सेती प्रादेशिक अस्पतालमा कार्यरत डा.अशोक श्रीपाइलीलाई दिइएको छ । गेटाका निर्देशक डा विप्लव सापकोटालाई फिर्ता बोलाइएको छ । त्यसैगरि केही समयअघि मात्रै टेकु अस्पताल पठाइएका डा. अनुप बास्तोलालाई मन्त्रालय सरुवा गरिएको छ । उनलाई छिट्टै विशेष जिम्मेवारी दिने तयारी मन्त्रालयले गरेको छ ।
टेकुस्थित स्वास्थ्य सूचना तथा सञ्चार केन्द्रका सूचना अधिकारी डा. भक्त केसीलाई मन्त्रालयको समन्वय महाशाखामा सरुवा गरिएको छ । डा केसीको स्थानमा उपेन्द्र ढुंगानालाई सरुवा गरिएको छ ।
आयुर्वेद तथा वैकल्पिक चिकित्सा विभागको समेत नेतृत्व सम्हालिरहेका सिंहदरबार वैद्यखानाका निर्देशक डा.प्रदीप केसीलाई वैद्यखानामै केन्द्रित गर्ने निर्णय गरिएको छ ।