विश्व बाथरोग दिवसको अवसर पारेर राजधानीको रातोपुलमा रहेको नेशनल बाथरोग सेन्टरले असोज २६ देखि ३० गतेसम्म निशुल्क बाथरोग शिविर सञ्चालन गरेको छ । सेन्टरले न्यून आय भएका विरामीहरुका लागि हरेक दिन २ बजेदेखि ४ बजेसम्म सामुदायिक क्लिनिक समेत सुरु गरेको छ । उक्त सामुदायिक क्लिनिकमा ५० रुपैया तिरेर बाथरोगको जाच गराउन सकिने नेशनल बाथरोग सेन्टरका प्रबन्ध निर्देशक रोशन कक्षपतिले बताए ।
सेन्टरले नेपाल रुमाटोलोजी एसोशिएसन र लाइन्स क्लवको संयुक्त आयोजनामा बिहीबार राजधानीको सुन्धरा र ललितपुरको जावलाखेलमा वृहत बाथरोग प्रदर्शनी आयोजना गरेको छ । उपचारमा ढिलो नगरौ भन्ने मूल नाराका साथ विश्व बाथरोग दिवस बनाउन लागिएको हो । कार्यक्रममा डा. अभिलासा शाह, डा. लक्की शर्मा र डा. दिपेश शाक्य लगायतले बाथरोग र यसको उपचारका बिषयमा जानकारी दिएका थिए । सेन्टरले बिगत ५ वर्षदेखि बाथरोग दिवस मनाउदै आइरहेको छ । नेपालमा बाथरोगीको आधिकारिक तथ्यांक नभए पनि बाथरोगीको संख्या हरेक वर्ष बढ्दै गइरहेको विज्ञहरु बताउछन् । त्यसमध्ये हड्डी खिइने समस्या प्रमुख रहेको बाथरोग विशेषज्ञ डा. दिपेश शाक्य बताउछन । हड्डी खिइने समस्या बढ्दै गइरहेको अवस्थालाई ध्यानमा राखेर सेन्टरले हरेक दिन साझ ४ बजेदेखि ओस्टियोपोरोसिस क्लिनिक सुरु गरेको प्रवन्ध निर्देशक कक्षपतिले जानकारी दिए ।
विज्ञहरुका अनुसार हातका औलाहरु दुख्नु, बिहान उठ्ने बेलामा हातखुट्टा अप्ठेरो हुनु, गोलीगाठो खुख्नु, पिडौला दुख्नु र करकर खानु, मांसपेसी कमजोर हुनु, चिसोमा काम गर्दा हातखुट्टा निलो हुनु तथा राती र विहान ढाड दुख्नु जस्ता बाथ रोगका लक्षण हुन । समयमै उपचार गराउन सके बाथरोगबाट बच्न सकिने बाथरोग विशेषज्ञ डा. शाक्यको भनाई छ ।
Leave a Reply