९ बुदें घोषणापत्र जारी गर्दै सकियो एनएमए चौथो हेल्थ समिट

हेल्थ टुडे,
काठमाडौं, २९ मंसिर : ९ बुदें घोषणापत्र जारी गर्दै नेपाल चिकित्सक संघ (एनएमए) को आयोजनामा शुक्रबारदेखि राजधानीमा सुरु भएको चौथो हेल्थ समिट शनिबार सम्पन्न भएको छ । उक्त ९ बुदे घोषणा पत्रललाई आयोजक नेपाल चिकित्सक संघका अध्यक्ष डा. अनिल विक्रम कार्कीले स्वास्थ्य तथा जनसंख्या मन्त्रालयका सचिव डा. रोसन पोखरेललाई हस्तान्तरण गरेका छन् ।
सम्मेलन समापनको अवसरमा बोल्दै स्वास्थ्य तथा जनसंख्या मन्त्रालयका सचिव पोखरेलले सम्मेलनका क्रममा उठेका विषयलाई मन्त्रालयले उच्च महत्व दिएर कार्यन्वयनमा लैजाने बताए । सम्मेलनमा स्वास्थ्यका विषयमा विज्ञहरुले महत्वपूर्ण सल्लाह र सुझाव दिएको बताउदै सचिव पोखरेलले यस प्रकारका सम्मेलन मन्त्रालयका लागि मार्गदर्शक हुने गरेकोमा जोड दिए । बैज्ञानिक समितिका अध्यक्ष प्रा. डा.रमेशकान्त अधिकारीले स्वास्थ्यका विभिन्न आयामका विषय समावेश गरेर ७ वटा प्यानल बनाएर गरिएको छलफल निकै फलादयी भएको बताए ।
आयोजक नेपाल चिकित्सक संघका अध्यक्ष डा. अनिलविक्रम कार्की र महासचिव डा. सञ्जिव तिवारीले विगत चार वर्षदेखि आयोजना हुदै आइरहेको समिटले नेपालको स्वास्थ्य सुधारका लागि विभिन्न सुझाव दिएको बताउदै यी सुझावहरुलाई स्वास्थ्य मन्त्रालयले लागु गर्ने बताए ।