स्वास्थ्य पत्रकार जोशीलाई क्यान्सर सचेतना तथा हिंसाविरुद्धको राष्ट्रिय पत्रकारिता पुरस्कार

हेल्थ टुडे,
काठमाडौं, ९ फागुन : नवलपुरमा स्थापित राधा क्यान्सर सचेतना तथा हिंसाविरुद्धको राष्ट्रिय पत्रकारिता पुरस्कार स्वास्थ्य पत्रकार पदमराज जोशीलाई प्रदान गरिएको छ । क्यान्सर रोग र महिला र्हिसा विरुद्व कलम चलाए वाफत रु. २० हजार नगद सहित उक्त पुरस्कार पत्रकार जोशीलाई प्रदान गरिएको हो । नवलपुरको कावासोती नगरपालिका २ मा शुक्रबार आयोजना गरिएको कार्यक्रममा गण्डकी प्रदेशका पूर्व कानून मन्त्री एवं सभासद् रोशन बहादुर गाहाले उक्त पुरस्कार प्रदान गरेका हुन् । दुई दशकदेखि स्वास्थ्य पत्रकारितामा क्रियाशिल पत्रकार जोशी हेल्थ टुडे पत्रिकाका सम्पादक हुन ।
पुर्व मन्त्री गाहाले रोग लागेपछि उपचार गर्नु भन्दा रोग लाग्नै नदिन सचेतना अभियानको खाचो भएको बताउदै पत्रकारहरुले सचेतना जगाउने काममा महत्वपूर्ण भूमिका खेल्न सक्नेमा जोड दिए । कार्यक्रममा राधा क्यान्सर सचेतना फाउन्डेसनका अध्यक्ष प्रकाश बस्यालले क्यान्सरको जोखिम बढ्दै गएकोले यसका विषयमा सचेतना आवश्यक रहेको बताए । पुरस्कृत पत्रकार जोशीले पुरस्कारले आफुमाथि स्वास्थ्य सचेतना जगाउन थप जिम्मेवारी थपिएको बताउदै स्वस्थ्य समाजको निर्माणका लागि जनचेतना र उपचार सँगसँगै लैजानु पर्ने आवश्यक रहेकोमा जोड दिए ।
कार्यक्रममा बोल्दै औषधि वितरक संघ नवलपुरका सचिव राजु भुसालले क्यान्सर सचेतनाकालागि सबैले हातेमालो गरेर अघि बढ्नुपर्ने बताए । उनले करिब ९० प्रतिशत मानिस खानपानमा ध्यान नदिँदा क्यान्सरजस्तो घातक रोगको सिकार भएको बताए । फाउण्डेसनका संरक्षक शुभराज बस्यालले स्वर्गिय राधा बस्यालले सुरु गरेको सचेतना अभियानलाई मर्न नदिन आफुहरु लागिपरेको जानकारी दिए । विसं २०४८ सालमा जन्मिएकी पत्रकार राधा बस्यालको २०७७ कार्तिक १४ गतेका दिन स्तन क्यान्सरको कारणले निधन भएको थियो । एक दशक भन्दा लामो समयदेखि नवलपुरमा रहेर पत्रकारिता गर्दै आएकी थिइन् । राधाले वैवाहिक जीवनपछि व्यक्तिगत रूपमा घरेलु हिंसा र क्यान्सरसँग लड्दै आएकी थिइन् ।