मधेस प्रदेशका मुख्यमन्त्री सिंहद्वारा रौतहटका १० निजी अस्पताल बन्द गर्न निर्देशन

हेल्थ टुडे,

वीरगञ्ज, २३ फागुन : मधेस प्रदेशका मुख्यमन्त्री सतिस सिंहले रौतहटको गरुडा नगरपालिकामा रहेको दसवटा निजी अस्पताल बन्द गर्न निर्देशन दिएका छन् ।
बिहीबार मुख्यमन्त्री सिंहसहितको टोलीले गरुडामा रहेका अस्पतालहरूको अनुगमन गरेको थियो ।अनुगमनको क्रममा ती अस्पतालहरू विधिसम्मत ढङ्गले सञ्चालन नभएकोले बन्द गर्न निर्देशन दिएको मुख्यमन्त्री सिंहले बताए । ‘रौतहटको गरुडा नगरपालिकाका १० वटा निजी अस्पतालको अनुगमन गरेँ । ती जम्मै अस्पताल विधिसम्मत ढङ्गले सञ्चालन भएका देखिएनन्, ‘ उनले भने, त्यसैले ती अस्पताललाई बन्द गर्न निर्देशन दिएको छु ।’
गरुडा नगरपालिका–५ शिवनगरमा रहेको आनन्द अस्पताल एक्यूपन्चर सेन्टर प्रालि, वडा नम्बर(४ गरुडामा रहेको अनामिका हस्पिटल, रोमा हस्पिटल, सरस्वती हस्पिटल, सन सिटी हस्पिटल, गरुडा अस्पताल प्रालि, नेत्र ज्योति, होप अस्पताललाई बन्द गर्न निर्देशन दिइएको हो ।
मापदण्ड पुरा गरेपछि मात्र अस्पताल सञ्चालन गर्न भन्दै नियम प्रक्रिया नपुगुन्जेलसम्म हस्पिटल बन्द राख्न सञ्चालकहरुलाई पत्र थमाइएको थियो । मुख्यमन्त्री सिंहले यस अघि चन्द्रनिगाहपुर स्थित अनुगमनको क्रममा १० वटा अस्पताल बन्द गर्न निर्देशन दिएका थिए।