सुर्तीजन्य पदार्थ नियन्त्रणका सबैको सहकार्य आवश्यक

हेल्थ टुडे,
गोर्खा, २६ जेठ : सुर्तीजन्य पदार्थ नियन्त्रण र निगमनमा सबैको सहयोग र सहकार्य आवश्यक रहेको विज्ञहरुले बताएका छन् । उनीहरुले स्थानिस सरकार जिम्मेवार बन्नु पर्ने बताएका छन । राष्ट्रिय स्वास्थ्य शिक्षा, सूचना तथा सञ्चार केन्द्र र हेल्थ टुडे मिडियाको संयुक्त आयोजनामा आयोजना गरिएको सुर्तीजन्य पदार्थ नियन्त्रण र नियमन सम्बन्धि सरोकारवालाहरुबिचको अन्तरक्रियामा विज्ञहरुले स्थानिय सरकारको जिम्मेवारी प्रति सुझाव दिएका छन् । अन्तरक्रियामा जनस्वास्थ्य विज्ञ डा. उत्सव कार्कीले सुर्तीजन्य पदार्थ नियन्त्रण एवं निगमनमा संघिय सरकारको प्रयासले मात्र संभव नहुने बताउदै स्थानिय सरकारले सुर्तीजन्य पदार्थ नियन्त्रण र निगमनलाई प्राथमिकतामा राख्नु पर्ने बताए । नेपालमा नसर्ने रोगको बढ्दो प्रकोपको प्रमुख कारण मध्ये सुर्तीजन्य पदार्थको सेवन पनि भएको बताउदै डा.कार्कीले कानूनले सार्वजनिक स्थालमा सुर्तीजन्य पदार्थ सेवन निषेध गरे पनि यसको व्यवहारमा पालना हुन नसकेको औल्याए । सार्वजनिक स्थलमा सुर्तीजन्य पदार्थको सेवनमा रोक लगाउन स्थानिय सरकारले कदम चाल्ने पर्ने र यसले धेरै हदसम्म कानून कार्यन्वयन हुने डा.उनले जोड दिए । खुद्रा व्यापारीले अनिवार्य रुपमा वडामा दर्ता गराएर मात्र सुर्तीजन्य पदार्थको विक्रीवितरण गर्ने व्यवस्था गर्ने र सार्वजनिक स्थलको १०० मिटर दूरीभित्र बेचविखन गर्न नदिएर स्थानिय निकायले यसको नियन्त्रणमा महत्वपूर्ण भूमिका खेल्न सहयोग गर्ने वरिष्ठ स्वास्थ्य पत्रकार पदमराज जोशीले बताए । जोशीले सुर्तीजन्य पदार्थ सेवन गर्नु फाइदाजनक होइन भन्ने कुरा धेरैलाई जानकारी भएपनि चेतनाको अभावमा व्यवहारमा उक्त जानकारी लागु गर्न नसकिएको बताए । सुर्तीजन्य पदार्थको सेवन न्युनिकरणमा नागरिक समाज, सरोकारवाला, मिडिया र स्थानिय सरकारले सहकार्य गरेर अगाडि बढ्नु पर्ने आवश्यकता रहेको स्वास्थ्य पत्रकार जोशीले बताए । कार्यक्रममा सहभागीहरुले सोधेका विभिन्न जिज्ञाषाहरुको विज्ञहरुले उत्तर दिएका थिए ।