उच्च रक्तचाप भएका व्यक्तिकालागि यौन सम्पर्क घातक हुन सक्ने अध्ययनले देखाएको छ । बेलायतको लण्डनस्थित एक स्वास्थ्य अनुसन्धान केन्द्रले अध्ययन प्रतिवेदन सार्वजनिक गर्दै उच्च रक्तचाप भएका व्यक्तिले चिकित्सकको परामर्श र आफ्नो रक्तचापको अवस्था हेरेर मात्र यौन सम्पर्क राख्न सुझाव दिएको छ । लिजा हेल्थ रिसर्च सेन्टरले हालै सार्वजनिक गरेको अध्ययन प्रतिवेदन अनुसार यौन सम्पर्कको समयमा व्यक्तिको शारिरीक सक्रियता र भावनात्मक संवेगका कारण मुटुको पनि धड्कन बढ्दा रक्तचाप पनि बढ्छ ।
अध्ययनमा समावेश गरिएका ४० प्रतिसत व्यक्तिको यौन सम्पर्कका बेला रक्तचाप उच्च विन्दुमा पुगेको पाइएको छ । रक्तचाप उच्च विन्दूमा पुग्नु भनेको व्यक्तिकालागि घातक हुने भएकाले उच्च रक्तचाप भएका व्यक्तिले यौन सम्पर्क गर्दा बिचार गर्नु पर्ने अनुसन्धानकर्ताहरुले औल्याएका छन् । रक्तचाप कम उमेरका मानिसका लागि त्यति घातक नभए पनि उमेर पुगेका र उच्च रक्तचाप भएका व्यक्तिका लागि यौन सम्पर्क घातक हुन सक्छ । रक्तचाप उच्च अवस्थामा पुगेको बेला उत्तेजनामा आएर यौन सम्पर्क गर्दा कहिलेकाही त्यसको परिणाम अप्रिय हुने अध्ययनले देखाएको छ । यस्ता व्यक्तिहरुले निरन्तर रुपमा डाक्टरको सल्लाह लिएर मात्र यौन सम्पर्क गर्नु राम्रो हुने अनुसन्धानकर्ताले सुझाव दिएका छन् । रक्तचाप कम भएको बेला भने यौन सम्पर्कले हानी नगर्ने उनीहरुले बताएका छन् । ( एजेन्सीको सहयोगमा )
Leave a Reply