यी हुन एक वर्षमा २ अर्ब ५० करोड ठग्ने अस्पताल

हेल्थ टुडे

काठमाडौं, ५ पुष :  राजधानीका नाम चलेका ५ निजी अस्पतालले मात्र एक वर्षमा २ अर्ब ५० करोड ठगी गरेको पाइएको छ । आपूर्ति व्यवस्थापन तथा उपभोक्ता हित संरक्षण विभाग गत हप्ता गरेको अनुगनमा क्रममा यो तथ्य फेला परेको हो ।

यसरी विरामी ठग्ने अस्पतालहरुमा डा. अशोक बास्कोटा र डा. जगदिशलाल बैद्य प्रमुख रहेको वि एण्ड वि, डा. चक्रराज पाण्डे निर्देशक रहेको ग्राण्डी इन्टरनेशनल हस्पिटल, डा. उपेन्द्र देवकोटा प्रमुख रहेको न्यूरो हस्पिटल, रवि चौधरी प्रमुख रहेको बयोधा हस्पिटल र वसन्त चौधरीको लगानीमा सञ्चालित नर्भिक हस्पिटल रहेका छन् । अध्ययन अनुसार यी ५ वटा अस्पतालले बर्षमा २ अर्व ५० करोड भन्दा बढी ठगिगरेको पाइएको  विभागका महानिर्देशक कुमार दाहालले बताए ।   ।विरामीको ढाड सेक्ने गरि चर्को शुल्क असुल्ने निजी अस्पताल विरुद्घ मुद्दा चलाइने तयारी गरेको छ । सरकारले अनुगनका क्रममा नियम विपरित विभिन्न सेवाका बहानामा चर्को शुल्क लिइरहेका ती अस्पतालका विरुद्घ मुद्दा दायर गर्न लागेको हो ।

चर्को शुल्क असुलेको पाएपछि आपूर्ति व्यवस्थापन तथा उपभोक्ता हित संरक्षण विभागले मुद्दा दायर गर्ने तयारी गरेको छ । विभागले अनुगमनका क्रममा नियम बिपरित चर्को शुल्क असुलिरहेका यिनी अस्पतालहरु विरुद्घ मुद्दा दायर गर्न लागेको विभागका महानिर्देशक दाहालले बताए । यी अस्पतालहरुलाई कानूनी दायरामा ल्याएर कारवाही गर्न मुद्दा दायर गर्न लागिएको उनले बताए । सरकारी वकिलसँग राय लिने काम भइरहेको बताउँदै जनताको ढाड सेक्ने अस्पतालहरुलाई त्यतिकै नछोडिने उनले दाबी गरे । यी अस्पताल विरुद्घ  कालो बजारी तथा समाजिक अपराध सजाय ऐन २०३२ र उपभोक्ता संरक्षण ऐन २०५४ अनुसार मुद्दा दायर गर्ने तयारी बिभागको छ । अस्पताल सञ्चालकहरुले स्पष्ठ जवाफ दिन नचाहेकाले उनीहरु विरुद्घ मुद्दा दायर हुन लागेको छ ।