चिकित्सकमाथि दुव्यवहार गर्ने गृहमन्त्रीका सल्लाहकारलाई कारवाहीको माग

हेल्थ टुडे,

काठमाडौं, २८ असार : देश भरिका चिकित्सकहरुको छाता संगठन नेपाल चिकित्सक संघले ट्रमा सेन्टरमा कार्यरत चिकित्सक डा. भोजराज अधिकारीलाई अपहरण शैलीमा गृह मन्त्रालयमा लगेर धम्क्याउने गृह मन्त्रीका सल्लाहकार सूर्य सुवेदीलाई कडा कारवाहीको माग गरेको छ । द्वन्दकालका घाइतेहरुको अपांगता प्रमाणपत्र उनीहरुले भने अनुसार किन नबनाएको भन्दै सुवेदीले डा. अधिकारीलाई गृह मन्त्रीको आदेश भन्दै मन्त्रालय बोलाएर केरकार गर्दै धम्क्याएका थिए ।

संघले राज्यको सुरक्षा गर्ने निकायका अधिकारीले नै अपराधीको जस्तै व्यवहार गरेको घटनाको घोर विरोध गर्दै संघले यस किसिमका घटना भविश्यमा नदोहर्याउन चेतावनी दिएको छ । अस्पतालमा कार्यरत रहेको अवस्थामा शक्तिको चरम दुरुपयोग गर्दै अपहरण शैलीमा गृह मन्त्रालय गलेर धम्क्याएको घटनाले लोकतन्त्रमाथि नै प्रहार गरेको ठहर गर्दै संघले विज्ञप्ति मार्फत यस कार्यमा संलग्न सुबेदी सहितलाई कडा कारवाही गर्न माग गरेको छ । गृह मन्त्रीका सल्लाहकार सुवेदीले गृह मन्त्रीले बोलाएको छ भन्दै डा. अधिकारीलाई अपहरण शैलीमा गाडीमा राखेर प्रहरीले गृह मन्त्रालय लगेका थिए । यस घटनाको नागरिक समाज, राजनीतिक दल, स्वास्थ्य क्षेत्र र सर्वसाधारणले व्यापक विरोध गरेका छन् ।