अस्पताललाई सुविधा युक्त बनाउन सरकारको पूर्ण सहयोग–स्वास्थ्यमन्त्री

हेल्थ टुडे,
चितवन, २७ साउनः उपप्रधान एवं स्वास्थ्य तथा जनसंख्यामन्त्री उपेन्द्र यादवले चितवनको बिपी कोइराला मेमोरियल क्यान्सर अस्पतालको स्थलगत अनुगमन गरी गुणस्तरीय सेवा प्रदान गर्न निर्देशन दिनुभएको छ ।
उहाँले बिरामीको सेवामा ढिलासुस्ती नगरी सेवालाई प्रभावकारी बनाउनुपर्नेमा जोड दिनुभयो । स्वास्थ्यमन्त्री यादवले चितवनको क्यान्सर अस्पताललाई अन्कोलोजीको विषयमा एमसिएच र डिएम अध्ययनका लागि प्रतिष्ठानका रुपमा विकास गर्न मन्त्रालय सकारात्मक रहेको बताउनुभयो ।
अस्पतालको सेवालाई पूर्व क्षेत्रमा समेत लैजानुपर्ने आवश्यकता औँल्याउँदै उहाँले अस्पताललाई सुविधा युक्त बनाउन आवश्यक सहयोग गर्ने आश्वासन समेत दिनुभयो । क्यान्सरको उपचारमा उत्कृष्ट संस्था बनाउन मन्त्रालयले आवश्यक सहयोग गर्नेसमेत उहाँको भनाइ थियो ।
मन्त्री यादवले आज अस्पतालको रेडियो थेरापी, डाइग्नोसिस, प्याथोलोजी, डेकेयर, हस्पीस वार्ड र नवनिर्मित २०० श्ययाको भवनको स्थलगत निरीक्षक गर्नुभएको अस्पतालका कानूनी अधिकृत गोकर्ण सापकोटाले जानकारी दिनुभयो ।
सो क्रममा अस्पतालका निमित्त कार्यकारी निर्देशक निर्मल लामिछानेले अस्पतालका योजना र गतिविधिका बारेमा जानकारी गराउनुभएको थियो । हाल क्यान्सर अस्पताल २२५ श्ययामा सञ्चालित छ ।