नर्भिकले सय बेडको थप सुविधासम्पन्न अस्पताल बनाउने  

हेल्थ टुडे,

काठमाडौ : नर्भिक इन्टरनेशनल हस्पिटलले सय बेडको नयाँ भवनसहितको छुट्टै हस्पिटल बनाउने भएको छ ।  विश्व मुटु दिवसको अवसरमा शनिबार हस्पिटल परिसरमा आयोजित कार्यक्रममा हस्पिटलका अध्यक्ष बसन्तकुमार चौधरीले सय बेडको थप हस्पिटल बनाउने र नर्भिकलाई दक्षिण–पूर्वी एशियाकै  उत्कृष्ठ हस्पिटलको रुपमा विकास गर्ने घोषणा गरेका हुन । नर्भिकलाई मुटु रोगको उपचारको उत्कृष्ठ थालोको रुपमा मात्र नभएर हरेक रोगको उपचारको विशिष्ठ सेवा पाउन सकिने मल्टिस्पेसियालिटी सेन्टरको रुपमा अगाडि बढाउने काम अगाडि बढेको अध्यक्ष चौधरीले बताए ।

कार्यक्रममा स्वास्थ्य राज्यमन्त्री डा. सुरेन्द्रकुमार यादवले सरकारले निःशुल्क उपलब्ध गराइरहेको डायलाइसिस लगायतका सेवाहरु निजी अस्पतालहरुमा पनि विस्तार गनुपर्नेमा जोड दिदै नेपाली स्वास्थ्य सेवाको स्तर माथि उठाउन निजी क्षेत्रका हस्पिटलहरुसँग हातेमालो गर्दै अघि बढ्न सरकार तयार रहेको बताए ।

नर्भिकका बरिष्ठ मुटुरोग विशेषज्ञ डा.यादवदेव भट्टले नर्भिकको मुटुरोग विभागलाई नेपाली जनताको उच्चतम् सेवाका खातिर नयाँ उचाईमा पु¥याउने योजना रहेको बताए । हृदयाघात पश्चात् बिरामीको ज्यान बचाउन गरिने एन्जियोप्लाष्टी तथा स्टेन्ट प्रत्यारोपका लागि अमेरिकन कार्डियाक एशोसियनले निर्धारण गरेको  (प्रक्रिया सकेर बिरामी शय्यामा सार्ने) समय घटाएर नेपालले मुटुरोग सेवाको गुणस्तरको प्रमाणित गरेको बताए । अर्का मुटुरोग विशेषज्ञ डा. जे.पी. जैसवालले विरामीहरु मात्रै नभएर स्वस्थ व्यक्तिले समेत स्वस्थकर भोजन र उपयुक्त जीवनशैली अपनाउनुपर्ने बताए । नर्भिकमा आयोजित समारोहमा नर्भिकमा गत वर्ष सफल मुटुरोग उपचार गराई स्वस्थ जीवन यापन गर्दै आएका बिरामीहरू सहित करिब २०० जना विशिष्ट व्यतित्वलाई समेत सहभागी गराइएको थियो ।

नेपालमा पनि शहरी जनसंख्याको झण्डै ७ देखि ८ प्रतिशत मानिसहरू कुनै न कुनै प्रकारका मुटुरोगबाट ग्रसित छन् । नर्भिकले रहेक वर्ष विश्व मुटु दिवसको अवसरमा जनचेतनामूलक कार्यक्रम समेत आयोजना गर्दै आईरहेको छ ।