काठमाडौ,१५ फागुन । स्वास्थ्य राज्यमन्त्री डा. सुरेन्द्रकुमार यादवले सबै स्थानीय निकायमा १५ शैय्याको अस्पताल बनाउन आर्थिक अभाव रहेको बताउनुभएको छ । राज्यमन्त्री यादवले संघीयता अनुरुप स्वास्थ्य सेवा संचालनको लागि स्वास्थ्य प्रतिष्ठान सञ्चालन सम्बन्धी नयाँ ऐन ल्याउन लागिएको जानकारी दिनुभयो । मंगलबार प्रतिनिधिसभामा प्रस्तुत भएको स्वास्थ्य वीमा सम्बन्धी जरुरी सार्वजानिक महत्वको प्रस्ताव माथि सांसदहरुले राखेको जिज्ञासाको जवाफ दिँदै राज्यमन्त्री डा. यादवले स्वास्थ्य सस्थामा जनशक्ति,उपकरण तथा औषधिको अभाव हुन नदिन मन्त्रालयले गृहकार्य गरिरहेको बताउनुभयो ।
उहाँले स्थानीय निकाय, प्रदेश तहका स्वास्थ्यले कुन कुन सेवा दिने भन्ने स्पष्ट व्यवस्था गरिएको, ती निकायबाट प्रदान गर्ने सेवाको अनलाइन रिपोटिङ सुरु भएको र प्रदेश तहबाट टेलिमिडिसियन सेवा समेत सुरु गरिएको जानकारी दिनुभयो । राज्यमन्त्री यादवले बालुवा, ढुङ्गा किन्ने प्रक्रिया जस्तै सार्वजानिक खरिद ऐनद्वारा औषधि खरिद प्रक्रियाले समस्या परेको उल्लेख गर्दै हाल १०२ पालिकामा मात्र अस्पताल रहेको र आगामी वर्ष २११ अस्पताल निर्माण गर्ने गृहकार्य भईरहेको जानकारी दिनुभयो ।
उहाँले एक चिकित्सक एक स्वास्थ्य सस्था , एकहजार २०० वडामा स्वास्थ्य सस्था स्थापना गर्ने लक्ष्य रहेको , ती सस्थामा चिकित्सक ,उपकरण तथा औषधि अभाव हुन नदिने प्रतिवद्धता जनाउनुभयो । जनसंख्या आधारमा नेपालमा ६० हजार अस्पताल बेड संख्या हुनुपर्नेमा सरकारी सात हजार ५०० र निजी अस्पतालसित एकहजार सातसय मात्र रहेको जानकारी दिँदै राज्यमन्त्री डा. यादवले हाल रहेको ११३ वटा अस्पतालमा २११ थप गर्ने जानकारी दिनुभयो ।
Leave a Reply