हेल्थ टुडे,
चितवन : सातौ नेपाल फर्मा एण्ड हेल्थ एक्स्पो शुक्रबारदेखि चितवनको प्रदर्शनी केन्द्रमा शुरु भएको छ । तिनदिनसम्म चल्ने एक्स्पोको उद्योग, वाणिज्य तथा आपूर्ति मन्त्री मातृकाप्रसाद यादवले उद्घाटन गरेका हुन । उद्घाटन समारोहलाई सम्बोधन गर्दै मन्त्री यादवले औषधिमा नेपाललाई आत्मनिर्भर बनाउन सरकारले पूर्ण सहयोग गर्ने बताए । उनले भने, ‘ औषधिमा नेपाल आत्मनिर्भर हुनु पर्छ भन्ने कुरामा सरकार स्पष्ट छ । यसका लागि सरकार पूर्ण सहयोग गर्न तयार छ ।’ सरकारले कहाँ कहाँ सहयोग गर्नु पर्ने त्यसको स्पष्ट खाका ल्याएर छलफलमा आउन मन्त्री यादवले औषधि व्यवसायीलाई आव्हान गरे । पछिल्ला वर्ष नेपाली औषधि कम्पनीको संख्या बढ्दै जानु र नेपाली औषधिप्रति जनताको विश्वास बढ्दै जानु खुशीको कुरा भएको बताउदै मन्त्री यादवले गुणस्तरलाई सधै केन्द्रमा राखेर अगाडि बढ्नु पर्ने सुझाव दिए ।
कार्यक्रममा औषधि व्यवस्था विभागका महानिर्देशक नारायण ढकालले स्वदेशी उत्पादनलाई प्राथमिकतामा राखेर विभाग अगाडि बढीरहेको बताए । नेपाल उद्योग परिसंघका अध्यक्ष एवं देउराली जनता फर्मास्यूटिकल्सका कार्यकारी निर्देशक हरिभक्त शर्माले सरकारले देशलाई औषधिमा साच्चिकै आत्मनिर्भर बनाउने हो भने पहिलो चरणमा कम्तिमा पनि एक सय प्रकारका औषधिको आयातमा कडाई गर्नुपर्नेमा जोड दिए । विदेशबाट आइरहेको औषधिमा रोक लगाइन भने आत्मनिर्भर गफ मात्र हुने उनले बताए ।
नेपाल उद्योग वाणिज्य महासंघका उपाध्यक्ष उमेशलाल श्रेष्ठले सरकारले नीति परिवर्तन नगरेसम्म आत्मनिर्भर हुन नसकिने दावी गर्दै सरकारलाई उद्योगहरुलाई हेर्ने दृष्टिकोण नै परिवर्तन गर्नु पर्ने बताए ।
नेपाल औषधि उत्पादक संघका अध्यक्ष दीपकप्रसाद दाहालले सरकारले नेपाली उद्योगको विकास विस्तारमा सहजिकरण गरेको खण्डमा ५ वर्षभित्र नेपाल औषधिमा ८० प्रतिशत आत्मनिर्भर हुने दावी गरे । उनले भारत र बंगालादेश औषधि उद्योगको उदाहरण दिदै आत्मनिर्भर बन्न नेपालमा पनि सरकारले उद्योगलाई साथ र सहयोग गर्नु पर्नेमा जोड दिए । एक्स्पोमा स्वदेश र विदेशका गरी २ सय स्टल रहेको एक्स्पोका मिडिया कोअर्डिनेटर विप्लब अधिकारीले जानकारी दिए । एक्स्पोमा करिव ५० हजार दर्शक आउने अपेक्षा आयोजकले गरेको छ ।
Leave a Reply