हेल्थ टुडे,
चितवन,२ चैतः
मकवानपुरमा बर्डफ्लु देखिएपछि आसपासका जिल्लामा उच्च सतर्कता अपनाइइएको छ । पोल्ट्रीको राजधानी मानिने चितवन जिल्लामा भित्रिने नाकाहरुमा पक्षी जन्य वस्तु आयातमा कडाइ गरिएको छ भने कृषकलाई जैविक सुरक्षामा ध्यान दिन आग्रह गरिएको छ । चितवन हुँदै राजधानी काठमाडौ र बाहिरी जिल्लामा कुखुरा जन्य पदार्थ धेरै आवतजावत गर्ने हुदाँ क्वारेन्टाइनमा कडाइका साथ चेकजाँच थालिएको छ ।
भेटेनरी अस्पताल तथा पशु विज्ञ केन्द्रका चितवनका निमित्त प्रमुख डा .पर्शुराम फुयाल भनेः‘मकवानपुरमा बर्डफ्लु देखिएपछि जिल्ला छिर्ने नाकामा क्वारेन्टाइनलाई विशेष चेकजाँचका लागि निर्देशन दिइएको छ ।” अहिले जिल्लाका १५० कुखुराका नमूना परीक्षणका लागि काठमाडौँ पठाइएको छ । बर्डफ्लु संक्रमण हुन सक्ने देखिएकाले व्यवसायीलाई जैविक सुरक्षामा ख्याल गर्दै काम गर्न आग्रह गरिएको छ ।
देशका विभिन्न जिल्लामा जाने मुख्य राजमार्ग नै चितवन हुँदै जाने भएकाले यहाँका व्यवसायी अझै सतर्क हुन आवश्यक रहेको सरोकारवालाहरुले बताएका छन् । देशका विभिन्न क्षेत्रबाट लो प्याथोजेनिक शंकास्पद देखिएमा यहाँ नमूना परीक्षण गर्ने गरिन्छ । थप शंका लागेमा यहाँबाट केन्द्रीय प्रयोगशालामा पठाइँदै आएको छ ।
जिल्लामा लो प्याथोजेनिक अर्थात् एच नाइनका कारण धेरै कुखुरा मरे पनि हाई प्याथोजोनिक अर्थात् एच फाइभ भने देखिएको छैन् । नेपाल अण्डा उत्पादक सङ्घका केन्द्रीय अध्यक्ष त्रिलोचन कँडेलले मकवानपुरमा रोग देखिएसँगै देशभरका कृषकले जैविक सुरक्षामा विशेष ध्यान दिएको बताए ।
यसअघि चितवनमा बर्डफ्लु भित्रिदा कृषकले ठूलो नोक्सानी बेहोरेका थिए । पहिले पहिले भारतमा बर्डफ्लु देखिदा समेत नेपालमा खपतमा कमी आएको भए पनि पकाएर खाँदा असर नपर्ने भएपछि जिल्लामा नै रोग देखिदासमेत खपतमा भने कमी नआउने गरेको व्यवसायीहरुले बताएका छन् ।
यसैबीच,मकवानपुरमा बल्र्ड फ्लु देखिएपछि पर्सा जिल्ला र बिशेष गरी विरगञ्ज नाका, मकवानपुरका छिमेकी जिल्ला धादिङ,बारा लगायतका जिल्लामा पनि उच्च सर्तकता अपनाइएको छ ।
Leave a Reply