स्वस्थ समाज निर्माणको लागि स्वास्थ्य पत्रकारिताको विकास अपरिहार्य

हेल्थ टुडे,
धुलिखेल,१७ चैतः स्वस्थ समाज निर्माणको लागि मुलुकमा स्वास्थ्य पत्रकारिताको विकास अपरिहार्य रहेको औल्याउँदै सरोकारवालाहरुले स्वास्थ्य विटमा कार्यरत पत्रकारहरुको क्षमता अभिबृद्धिमा विशेष ध्यान दिनुपर्ने बताएका छन् । विभिन्न सञ्चारमाध्यममा हेल्थ बिटमा कार्यरत पत्रकारहरुको साझा संस्था ‘सोसाइटी अफ हेल्थकेयर जर्नलिस्ट नेपाल’ ले स्वास्थ्य पत्रकारहरुको क्षमता अभिबृद्धिका लागि धुलिखेलमा आयोजना गरेको तालिमका अवसरमा सरोकारवालाहरुले स्वास्थ्य पत्रकारको क्षमता बढाउन राज्य, सञ्चारगृह र स्वयं पत्रकारहरुले लगानी गर्नुपर्नेमा जोड दिएका हुन् ।

कार्यक्रममा काठमाडौं विश्वविद्यालयका डीन एवं धुलिखेल अस्पतालका मुटुरोग विशेषज्ञ डा. राजेन्द्र कोजूले स्वास्थ्य समाचार एकदमै संवेदनशिल हुने भएकाले स्वास्थ्य पत्रकार विषय वस्तुमा पोख्त हुनुपर्ने धारणा राखे । उनले मुलुकमा स्वास्थ्य पत्रकारिताको पढाइ हुनुपर्ने समेत बताए । सरकारले अस्पताल र अस्पतालका बेड थप्दैमा स्वस्थ समाज निर्माण गर्न नसकिने दाबी गर्दै स्वास्थ्य अधिकारकर्मी एवं प्राथमिक स्वास्थ्य सेवा स्रोत केन्द्र ( रेस्पेक) का कार्यकारी निर्देशक शान्तलाल मुल्मीले रोग लाग्नै नदिने वातावरण सिर्जना गर्नको लागि जनचेतना जगाउन स्वास्थ्य पत्रकारहरुको क्षमता बढाउनुपर्नेमा जोड दिए ।

सोसाइटी अफ हेल्थकेयर जर्नलिस्ट नेपालका अध्यक्ष अतुल मिश्रले सत्य, तथ्य र सन्तुलित स्वास्थ्य पत्रकारिताले स्वस्थ्य समाज निर्माणमा अहं भूमिका खेल्ने भएकाले स्वास्थ्य पत्रकारहरुको क्षमता बढाउनुपर्ने र यसमा राज्य लगायतका सम्बद्ध सबै पक्षले चासो राख्नु पर्ने बताए ।

कार्यक्रममा स्वास्थ्य पत्रकारहरु दीपक दाहाल, पूर्णभक्त दुवाल, भगवती तिमिल्सिना, कमला गुरुङ, रिता तिमिल्सिना र हेल्थ केयर जर्नलिष्ट सोसाइटिका महासचिव पदमराज जोशी लगायतले स्वास्थ्यका समाचारले सञ्चार माध्यममा उचित स्थान पाउनुपर्नेमा जोड दिए । प्राथमिक स्वास्थ्य सेवा स्रोत केन्द्रको सहकार्यमा सम्पन्न दुई दिने तालिममा २० जना स्वास्थ्य पत्रकारको सहभागिता रहेको थियो ।