हेल्थ टुडे,
काठमाडौ,३० चैतः स्वास्थ्य सेवा अन्र्तगतका कर्मचारी समायोजनमा व्यापक त्रुटि भएको भन्दै नेपाल स्वास्थ्यकर्मी संघले स्वास्थ्यको समायोजन स्थगन गर्न माग गरेको छ। शुक्रबार विज्ञप्ति जारी गर्दै संघले समायोजनलाई तत्काल स्थगन गरेर सरोकारवालासंग छलफल गर्न माग गरेको छ ।
संघले संघीय मामिला तथा सामान्य प्रशासन मन्त्रालयले प्रकाशन गरेको स्वास्थ्य सेवाका कर्मचारीहरुको समायोजन सूचीप्रति गम्भिर ध्यानाकर्षण भएको भन्दै समायोजनमा त्रुटि भएको जनाएको छ । उसले स्वास्थ्यकर्मीहरुको समायोजनमा देखिएको त्रुटिका कारण समग्र स्वास्थ्य सेवा प्रवाहमा समेत असर पर्ने चिन्ता प्रकट गरेको छ ।
संघले स्वास्थ्य सेवाका कर्मचारीहरुलाई समायोजन गर्दा तोकिएको आधार र मापदण्डलाई समेत बेवास्ता गरि कर्मचारी समायोजन गरेको आरोप लगाएको छ।
विज्ञप्तीमा भनिएको छः‘समायोजन कार्यमा प्रयोग गरिएको सफ्टवेयर विशुद्ध रुपमा प्रशासन सेवाका कर्मचारीहरुलाई लक्षित गरि निर्माण भएको र स्वास्थ्य सेवाको गम्भिरतालाई समेत ध्यान नदिई समायोजन प्रक्रिया अगाडी बढाएका कारण स्वास्थ्य सेवा तर्फका कर्मचारीहरुको समायोजनमा व्यापक त्रुटि भएको नेपाल स्वास्थ्यकर्मी संघको ठहर छ ।’
Leave a Reply