प्रधानमन्त्री ओली सिंगापुरमा, आजैदेखि स्वास्थ्य परीक्षण गरिँदै

हेल्थ टुडे,
काठमाडौ,६ भदौः शरीरमा एन्टिबडीको मात्रा बढी देखिएपछि प्रधानमन्त्री केपी शर्मा ओली थप परीक्षणका लागि सिंगापुरमा छन् । प्रधानमन्त्री ओलीको सिंगापुरस्थित नेसनल युनिभर्सिटी अस्पतालमा मिर्गौलाको कार्यक्षमता र औषधिको प्रभाव सम्बन्धमा परीक्षण हुनेछ । प्रधानमन्त्रीको निजी सचिवालयले दिएको जानकारी अनुसार प्रधानमन्त्री ओलीको आजैदेखि स्वास्थ्य परीक्षण सुरु गरिनेछ ।

दुवै मिर्गौला प्रत्यारोपण गरेको १२ वर्षपछि खराबी देखिएको छ । ओलीको शरीरमा एन्टिबडी देखिएको निजी चिकित्सक डा.दिलीप शर्माले जानकारी दिएका छन् । ओलीको उपचारका लागि सातदेखि दस दिनसम्म लाग्ने शर्माले जानकारी दिए । प्रधानमन्त्री ओलीले यसअघि १० दिन (साउन १८ गतेदेखि २७ गतेसम्म) सिंगापुरस्थित नेसनल युनिभर्सिटी अस्पतालमा उपचार गराएका थिए ।

एन्टिबडीलाई शरीरबाट निष्कासन गरी निराकरण गर्ने उपचार विधिलाई निरन्तरता दिन उनी पुनः सिंगापुर गएको निजी चिकित्सक डा. दिव्यासिंह शाहको भनाई छ । ६७ वर्षीय ओलीको मिर्गौलाको कार्यक्षमतामा ह्रास आएको चिकित्सकहरूले बताएका छन् । वरिष्ठ मिर्गौला रोग विशेषज्ञसमेत रहेकी निजी चिकित्सक डा. शाहका अनुसार ओलीको शरीरमा मिर्गौलासम्बन्धी एन्टिबडीको मात्रा केही बढी देखिएको छ ।

एन्टिबडी बढ्दा प्रत्यारोपण गरिएको मिर्गौलाको कार्यक्षमतामा ह्रास आएको संकेतका रुपमा लिनुपर्ने मिर्गौला रोग विशेषज्ञको भनाइ छ । मिर्गौलाको क्रियटिनिनको मात्रा पनि सामान्यभन्दा केही बढी देखिएको अर्का निजी चिकित्सक डा. शर्माले बताएका छन् । क्रियटिनिनको मात्रा सामान्य अवस्था १.५ भन्दा बढी अर्थात् २ को हाराहारीमा छ । प्रधानमन्त्री ओलीलाई एन्टिबडी बढेर समस्या भएको हो । एन्टिबडी बढेर भएको रिजेक्सन खतरनाक हो । तत्काल कुनै साधारण औषधिले ठिक हुन सक्दैन । क्रियटिनिन नर्मलबाट बढ्नु भनेको मिर्गौलाको कार्यक्षमता घटेको हो ।

निजी चिकित्सक डा.शर्माका अनुसार प्रधानमन्त्री ओलीले सेवन गरिरहेको औषधिको प्रभाव र मिर्गौलाको अवस्थाबारे सूक्ष्म परीक्षण हुनेछ । सिंगापुरमा रहँदा नेशनल युनिभर्सिटी अस्पतालमै नेपाली चिकित्सकका साथ त्यहाँका विज्ञहरुको टोलीले उनको मिर्गौलाको थप परीक्षण र क्षमता अभिबृद्धिका लागि आबश्यक उपचार समेत गर्ने जनाइएको छ । निजी चिकित्सकले सिंगापुरबाट प्रधानमन्त्रीको स्वास्थ्य अवस्थाबारेमा नियमित जानकारी गराउने जनाएपनि उनी प्रस्थान गरेपछिका थप विवरण सार्वजनिक गरिएका छैनन् ।