प्रसूति गृहको पनि आफ्नै फार्मेसी

हेल्थ टुडे
परोपकार प्रसूति तथा स्त्री रोग अस्पताल (प्रसूति गृह) ले सोमबारदेखि आफ्नै फार्मेसी सञ्चालनमा ल्याएको छ । अस्पतालको हाताभित्र सञ्चालन गरिएको फार्मेसीको प्रसूति गृहका निर्देशक प्रा.डा.अमिरबाबु श्रेष्ठले एक समारोहबिच उद्घाटन गरेका हुन् ।
अस्पतालको फार्मेसीमा बाहिरको औषधि पशलको भन्दा न्युनतम २० देखि ३० प्रतिसतसम्म सस्तो हुने दाबी अस्पतालको छ । प्रसूति गृहका निर्देशक डा. श्रेष्ठले भने, ‘केही औषधिमा त ३ सय प्रतिसत सस्तोमा दिन सकिन्छ भने केहीमा २० देखि ३० प्रतिसत सस्तोमा औषधि दिन सकिन्छ ।’ फार्मेसी सञ्चालन गर्न स्वास्थ्य मन्त्रालयले सिड मनी (बिउ पूजी) स्वरुप ३० लाख रुपैया उपलब्ध गराएको थियो ।
अस्पतालले सार्वजनिक खरिद ऐन अनुसार टेण्डरबाट प्याकेजमा औषधि किनिएको र प्याकेजमा किन्दा कुनै कुनै औषधि ३ सय गुना सस्तोमा पाइएकोले उपभोक्तालाई सस्तोमा दिन सकिने निर्देशक डा. श्रेष्ठले बताए । सेवाग्राहीलाई सर्वसुलभ रुपमा औषधि विक्री बितरण गर्न हरेक सरकारी अस्पतालको आफ्नै फार्मेसी सञ्चालन गर्नु पर्ने सरकार र सर्बोच्च अदालतको आदेश समेत अधिकांश सरकारी अस्पतालहरुले अटेरी गरिरहेका थिए ।
आइतबारसम्म प्रसूति गृह भित्र पनि निजी फर्मेसी सञ्चालनमा थियो । स्वास्थ्य मन्त्री गगन थापाले हरेक सरकारी अस्पतालले आफ्नै फार्मेसी सञ्चालन गर्न कडा निर्देशन दिनुका साथै त्यसका लागि सबै केन्द्रिय अस्पतालहरुलाई सिड मनी (बिउ पूजी) स्वरुप ३० । ३० लाख रुपैया उपलब्ध गराएपछि अहिले अधिकांश सरकारी अस्पताल फार्मेसी खोल्न बाध्य भएका हुन ।
अहिलेसम्म वीर अस्पताल, पाटन अस्पताल, मानव अंग प्रत्यारोपण केन्द्र, गंगालाल हृदयरोग केन्द्र, मनमोहन कार्डियोभास्कुलर एण्ड थोरासिस सेन्टर लगायतका अस्पतालले आफ्नै फर्मोसी सञ्चालन गरिसकेका छन् । अस्पतालको आफ्नै फार्मेसी भएपछि विरामीलाई थोरै भएपनि राहत मिल्ने छ ।