अब एमबिबिएस पास गरेपछि एक वर्ष दुर्गम जानै पर्ने

हेल्थ टुडे
एमबिबिएस पास गरेपछि हरेक डाक्टरले अब अनिवार्य रुपमा एक वर्ष दुर्गमका सरकारी स्वास्थ्य संस्थामा काम गर्नै पर्ने भएको छ । सरकारी डाक्टर दुर्गममा जान नमान्ने प्रवृतिमा सुधार आउन नसकेपछि स्वास्थ्य मन्त्रालयले मेडिकल कलेजहरुको सहकार्यमा एमबिबिएस पास गरेपछि अनिवार्य रुपमा एक वर्ष दुर्गममा गएर सेवा दिनै पर्ने व्यवस्था गर्न लागेको हो ।
अहिलेसम्म छात्रवृतिमा पढेका एमबिबिएस पास डाक्टरले मात्र दुर्गममा गएर काम गर्ने गरेका छन । अब छात्रवृतिमा पढेका मात्र नभएर सरकारी र निजी मेडिकल कलेजमा अध्ययन गरेका सबै एमबिबिएस उर्तीणले अनिवार्य रुपमा जानै पर्ने छ । त्यसका लागि उनीहरुले नेपाल मेडिकल काउन्सिलको लाइसेन्सिङ परीक्षा पास गरेको हुनु पर्ने छ । राजधानीमा मंगलबार आयोजित स्वास्थ्य मन्त्रालय र दातृ निकायको संयुक्त बार्षिक समिक्षा कार्यक्रममा स्वास्थ्य मन्त्री गगन थापाले दुर्गमका स्वास्थ्य संस्थामा स्वास्थ्यकर्मिको अभाव पूर्ति गर्न यस्तो व्यवस्था गर्न लागिएको बताए । स्वास्थ्य मन्त्रालयले केही दिन पहिले चिकित्सकका लागि विज्ञापन गर्दा समेत प्रयाप्त दर्खास्त नआए पछि मन्त्रालयले यस्तो नियम बनाउन लागेको मन्त्री थापाले जानकारी दिए । यसका लागि मेडिकल कलेजका अधिकारीहरुसंग छलफल भइरहेको उनले बताए ।
नेपालमा बर्षेनी १५ सय भन्दा बढी विद्यार्थी एमबिबिएस उर्तीण हुने गरेका छन । एमबिबिएस पास गरेपछि एक वर्ष दुर्गममा जानै पर्ने सर्तनामा भर्ना हुने बेला नै विद्यार्थीले गर्नु पर्ने गरि मेडिकल कलेजहरुसंग छलफल भइरहेको मन्त्रालयका एक अधिकारीले बताए । एमबिबिएस गर्न पाँच वर्ष लाग्छ । त्यसैगरि विशेषज्ञ चिकित्सकको अभाव कमगर्न मन्त्रालयले एमडी पास गरेपछि हरेक विशेषज्ञ चिकित्सकले ३ महिना राजधानी बाहिर जानै पर्ने नियम बनाएको छ । मेडिकल काउन्सिलले यस बिषयमा मेडिकल कलेज र चिकित्साशास्त्र अध्ययन प्रतिष्ठानलाई परिपत्र गरिसकेको छ । नेपाल चिकित्सक संघका महासचिव डा. लोचन कार्कीले एमडी उर्तीण हरेक चिकित्सकले विशेषज्ञ सेवा प्रदान गर्न कम्तिमा ३ महिना राजधानी बाहिरका सरकारी स्वास्थ्य संस्थामा जानै पर्ने परिपत्र गरिएकाले यसबै बर्षदेखि यो नियम लागु हुने बताए ।
सरकारले चाल्न थालेको यो कदम सकारात्मक भएको उनले बताए । नेपालको सरकारी सेवामा जम्मा १३०० चिकित्सक दरबन्दी छ । त्यस मध्ये ४०० जना हाकिम नै छन । २०० जति विदेश अध्ययनमा छन । बाकी ७०० जनाले सरकारी स्वास्थ्य सेवा धानी रहेका छन ।