फेरि जीवनजलको उत्पादन सुरू

 
सरकारी स्वामित्वको नेपाल औषधि उद्योग लिमिटेडले औषधि उत्पादन सुरू गरेको छ । आइतबारदेखि जीवनजल उत्पादन सुरू गरेको नेपाल औषधि उद्योग लिमिटेडका अध्यक्ष चन्दन कृष्ण श्रेष्ठले जानकारी दिए । श्रेष्ठले भने ‘छिट्टै नै ट्याब्लेट औषधिको पनि उत्पादन थालिने छ ।’ पुनः उत्पादन थाल्नको लागि अर्थमन्त्रालयले केहि महिनाअघि यस उद्योगलाई ६ करोड ४८ लाख रकम उपलब्ध गराएको छ ।

यस वर्षका लागि १२ करोड रकम दिनेभनेपनि उत्पादन नथाली बसेको हुँदा अर्थमन्त्रालयले ६ करोड मात्रै रकम दिएको थियो । ट्याब्लेट बनाउने मेसिन ल्याएसँगै सिटामोलको उत्पादन थालिने श्रेष्ठले जानकारी दिए । साथैे पहिलो चरणमा सरकारले देशभर निशुल्क रुपमा उपलब्ध गराएकामध्ये ८ प्रकारका औषधि समेत उत्पादन गर्ने तयारी छ । सरकारले ७ वर्षदेखि बन्द रहेको नेपाल औषधि लिमिटेडलाई पुनः सञ्चालनमा ल्याएको हो । ०६७ सालदेखि पूर्ण रुपमा बन्द भएको थियो ।

लामो समयसम्म उद्योग बन्द रहँदा लिमिटेड अहिले ऋणमा छ । सरकारको पूर्ण स्वामित्वमा सञ्चालित उद्योग निजी कम्पनीसँग प्रतिस्पर्धामा जान नसकेर ०५८ देखि घाटामा सञ्चालन हुँदै आएको थियो । साथै विगतमा सरकारमा रहेका उद्योगलाई दलहरुले कार्यकर्ता भर्ती केन्द्रको बनाएका थिए  । जसका कारण पनि यो उद्योग माथि उठ्न सकेको थिएन । बन्द हुनुअघिसम्म उद्योगले एक सय ५० प्रकारका औषधी उत्पादन गर्दै आएको थियो । यस उद्योगमा अहिले ९० जनाजति कर्मचारी कार्यरत छन् ।